دوز یاز !
سؤزلر زولال اولسون
شاعیر دَه گره ک اهلِ حال اولسون
چَک عالمی نظمه ، سؤزو دوز یان یانا سالک!
یاز هرنه یازیر سان آمما دوز یاز قویما حق پایمال اولسون
عؤمرون وفاسی یوخ بیزه ، دوران داها دؤنمه ز
ناحق دانیشانلاری لال اولسون
آز قیل و قال اولسون
کریم حیدر زاده ( سالک تبریزی )
***
آی کؤینگی ساری
آی خسته قوش آواره گزیرسن بو دیاری
زنداندی قفسدی چمنی باغی باهاری
گوزله اؤزیوی ، اووچی دیر هر یانی بو یوردون
قوزغون کیمی دؤرد گؤزلو گزیر کؤرپه شکاری
فرصت دالیسیجا گزیری أل یئری تاپسا
ویران قویاجاق یوردونو آی کوینگی ساری
تیک اؤز یووانی قویما سنه أل تاپا اووچی
سن بو یووا نین صاحیبی سن قان یئنه باری
جهد ائیله کی جان قورتاراسان اووچی الیندن
دوشسَن تورا فریاد ائله مه ! چَک بو فشاری
گولشنده کی یوخ ذوق و صفا آی ساری کؤینه ک
قاچ قاچ بو یئرین زهریلی دیر داری نداری
دیلله ن سَن اگر اووچی ائده ر قانینا غلتان
اوچسان آ یازیق تیر جفا قلبینی یاری
مین فیرتانا قالخیب دؤیه جه ک باشینا طوفان
هر کیمده اولا داغ کیمی دونیادا وقاری
گلسه باشیوا درد و بلا داغ کیمی دور باخ
آیدیندی بو سؤز توستو گئده ر گؤیچگه ساری
ایسته ر سنی صیاد اؤزونه رام ائده اما
ایغو دو گوره ر آج تویوغ البته کی داری
بو یاخشی مثل دیر کی بیزیم ائلده دئمیشله ر
بیر باخ آشاغی باخما اؤزوندن ده یوخاری
غم غصّه کیچیک قلبینی گر دؤیسه سیخیلما
بو گوند ه کئچه ر آخیری غملر ده قوتاری
اوندا کی چیخار گون یاییلار عالمه بیردن
اوندا کی قارا دان یئری صبح اولجاق آغاری
داغی داشی آسوده خیالیله گزه رسن
گولشنده نه شاختا گوره سن داغدا نه قاری
ظولمون ائوی ویران اولو ظالیم دوشه ر ألدن
قان دورماز اگر کَس سه پیچاق قیرسا داماری
بختین قاپیسی ایندی قیفیللانسا داریخما
هر بیر قیفیلین واردی طبیعت ده آچاری
اؤز جانیویله ن اویناما بو عرصه ده شیدا !
لیــلاج دغلبــــازیـله قیــزدیـرمــا قومــاری
رحمتلیک اوستاد یحیی شیدا
