غملی جانیم قاردا – سان
قارکوله ک،یای چاغلاری گولزاردا – سان
من کیم ایله درد دل ائیلیم ، کیمه پس یالـواریـم؟!
چؤلده سن؟ داغ داشداسان؟ بازارداسان؟
آه ، تانریـم! هارداسان؟
دادا
یاغیش تؤرنی
قوراقلیق ایللرینده، بیناب شهرینده گؤزونو گؤیه تیکن اینسانلارین اومودلاری کسیلدیکده، اونلار یاغیش آشی بیشیرمه لی اولدوقلارینی دوشونوردولر.
محله قادینلاری هره سی بیر قاب ایله قاشیق گؤتوره رک بیر یئره توپلاشیب، محله کوچه لرینده قاشیقلا قابین آلتینا ووراراق بیرلیکده «چؤمچه چؤم اوسته، آللاهدان یاغیش ایسته» دئیه- دئیه، قاپیلاری دؤیوب آش اوچون دن- دوش ییغیردیلار. سونرا یئنه بیرلیکده تونقال قالاییب، اود یاندیریب، توپلانان دن-دوش ایله یاغیش آشینیی بیشیریردیلر. بو آش بوتون قاپی- قونشولارا پایلانیردی. بو آرادا اوشاقلار دا تؤرنین ایلکیندن سونونا دک قادینلارین یانیندا اولوب، اونلارا یاردیم ائدیردیلر.
من بو تؤرنی ۱۳۶۵- ۱۳۶۲- اینجی ایللر آراسی اولان بیر ایلده بیناب دا گؤرموشدوم. چوخ آجیناجاقلی دیر کی، او چاغ کیچیک یاشلی اولدوغوم اوچون یالنیزجا بو قدرینی آنیرام. چوخ گومان کی، بو فولکلوریک تؤرن ده، چوخلو باشقا تؤرنلریمیز کیمی آرتیق آرادان گئدیب، یالنیزجا منیم کیمی لرین آنی سیندا قالیب دیر.
محمدرضا خیری فام
یاغماغیم گره ک
یئر- گؤی سئوگیسی دیر بیزیم سئوگیمیز
نئجه بولوت یاغار قارا توپراغا!
قارا یئرده نه وار؟ هئچ بیر شئی، بولوت
ایستکسیز باشلایار یئره یاغماغا
من همن بولوتام، سنسه قارا یئر
نه سنده سئوگی وار، نه منده ایستک
سانما سئودالینام یاغیرام سنه!
یالنیز چون بولوتام یاغماغیم گره ک
زهرا نظر نژاد
داریخیب داغلی قفسلر
( زلال )
عؤمروموز لاپ هدر اولدو
کؤنلوموز غصّه لی اولدو کدر اولدو
آرزیلار قوینوندا بیر واخت نه شیرین اویموشدوق، آمما
او شیـرین آرزیلار آخیـر زهَر اولـدو
گونـو گونـدن بتـر اولدو
*
آرزیلار هئی منی سسلر
داغیـدار سینـمی او غملی نفسلر
عؤمور حسرتله ساووشدو سؤزلر حبس اولدو قفسده
شاعیرین طبعی دیر عالملری بسلر
داریـخیب داغـلی قفسلر
کریم حیدرزاده (سالک)
بیلمه دین
آغلادیم گوزیاشیمی گیزلینجه سیلدیم بیلمه دین
دردین آلدیم جانیما اؤلدوم - دیریلدیم بیلمه دین
سن منیمله اؤزگه لشدین یاندیریب یاخدین منی
من سنی ملک دلین سولطانی بیلدیم بیلمه دین
سرو تک آزادایدیم طوفان اگنمزدی باشیم
قددیمی ائتدین کامان یای تک اگیلدیم بیلمه دین
یوسف حسنی اعظمی
تانریم!
( زلال )
آذربایجان زلزله سیندن یارانمیش سیتقاماق
آز شـوره دولگیلان
گل حؤووشنـه نی ائـلدن آلگیلان
یئـــر گـوجلـرین آزالـدا بیـلیـرسن آزالـد اؤزون
قوربـانینام دایـان، ائـله بـو اوچ ایـکی ریشتـرده قالگیـلان
قالخیزما بئل بوکن ته په ری یئددی سگگیزه
تـانریم! حاوادان طبلی سالگیلان
یومشاقجا چالگیلان
دادا بیلوردی
آغلیما نه گلیب منیم
قیش گؤل آچیر یاز یئرینه
آغلیما نه گلیب منیم؟!
قارقا قونور قاز یئرینه
آغلیما نه گلیب منیم؟!
*
تپه قالخیر داغام دئییر
قارا اوزو آغام دئییر
اؤلو دورور ساغام دئییر
آغلیما نه گلیب منیم؟!
موغان اوغلو
سودا تاپارام
یونس جمع آوری
قيزيم دونيايا خوش گلدين
گؤز آچدين گوللو دونيايه
قيزيم دونيايا خوش گلدين
سئوينجـــــيمدن قانــــادلانديم
اوچولــــــدوم آيا خوش گلدين
قيزيم دونيايا خوش گلدين
بو دونيا بــــير گؤزل دونيا
گؤزل ليـــكـده ازل دونيا
اوركـــــــــــلرده اؤزل دونيا
بو سایسیز ســــايا خوش گلدين
قيزيم دونيايا خوش گلدين
بو دونـــــيا بــــير آخار چاي دير
يا جنــنت يا اونـــــــا تـــــاي دير
عؤمــــور اينـــــسانا بير پاي دير
بو جوشـغون چايا خوش گلدين
قيزيم دونيايا خوش گلدين
حياتيـــن نظمـــــينه آخسان
اوزورسن اوندا خوشباخت سان
آتان "سؤنمز" چاتيب باخسان
دنيــــز دريـــايا خوش گلدين
قيزيم دونيايا خوش گلدين
سؤنمز
دؤنمه دیم
یار ویردی قلبیمه یارا دؤنمه دیم
گتیردی لاپ منی زارا دؤنمه دیم
عشقینده یاندیریب کول ائتدی منی
یاریمدان باشقا بیر یارا دؤنمه دیم
مجید جعفرزاده کسیانی (بی نام)
سنسیز
سنسیز اجل بو کؤنلومه باسلانسا نئیلرم
عومرون ایشیقلی گوزگوسو کاسلانسا نئیلرم
کؤنلوم ناحاقدان آیریلیغین داخماسیندادیر
سوچسوز او سوچلو دارلارا آسلانسا نئیلرم
سنسیز غزللریم بورونوب قیش بورونجه یین
حسرت قالیب گونشلیگه " پاسلانسا نئیلرم
تئز گل آپار بو کؤلگه سالان غم بولوتلارین
سندن قالان او خاطیره ایسلانسا نئیلرم
آچ اؤرپه یین دان اولدوزو تک یاسلی کؤنلومون
سنسیز گونش ده آی کیمی یاسلانسا نئیلرم
ملیحه خیر
زلزله
آغیر بیر فاجعه، غملی بیر خبر
حزین اورهگیمی درده سالیبدیر
اوخونور اؤلکهمده غم ترانهسی
کؤنلومو درد ایله کدر آلیبدیر
بیر یای آخشامیندا ائل دینجهلرکن
طبیعت قهرینی یامان گؤستریب
یوردوما بیر خزان یئلی اسرکن
یام یاشیل ائلینه دومان گؤستریب
قاری-قوجالاری، قیز-اوغوللاری
گؤر نئجه کامینا چکدی یئر آللاه
گئدنه مغفرت سندن، قالانا
یاردیم ائت، کؤمک اول، صبر وئر آللاه
ییغیشین ای منیم وطنداشلاریم
ائوی ییخیلانین دردینی بیلهک
غملی اورهکلره قویاق مرهمی
نیسگیللی گؤزلردن کدری سیلهک
بیر-بیره ال وئرک اللردن توتاق
سئل کیمی بیز آخاق گوجلو آی ائللر
نئجه کی رحمتلیک سعدی دئییبدیر
انسانلار بیر-بیردن آیری دگیللر.
فریده سلیمانی
![[تصوير: vvsv7s5nwqz1kqruy.jpg]](http://8pic.ir/images/vvsv7s5nwqz1kqruy.jpg)
آذربایجانیم!
کیچیک اوشاقلاریوی زلزله آلاندان بری گولمور اوزون
نئجه گولسون آخی؟
یالنیز دئییه بیلیرم باشین ساغ اولسون
قایغیلار بلالار سندن اوزاق اولسون
محمد عابدینپور
