اینتیظار
منیم چون زامانلار چوخ ناتارازدیر
آیریلیق سالماقدا سانکی آرازدیر
آیریلیق قورتولار اؤزو قارالیق
زامانا قالار بس هاواخ بیاض دیر
بونلارین اؤزو و ایندی سیرداشیم
گئجه نی گوندوزو بیر سینیخ سازدیر
اورگیم آیدیندیر گله جه ییم دن
آیریلیق دنیزی منه دایازدیر
هجرانین چوخ چاغی گئدیبدیر ایندی
بوندان ساری قالان مدتی آزدیر
اولدوزوم گله جک آی چیخان زامان
اوزویله گتدیگی تحفه سی نازدیر
فرید کریم زاده
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
عزیز اوخوجولار! آشاغیداکی شعر عزیز دوستوموز اوروجعلی شهودی جنابلارینداندیر. آنجاق کئچن نومره میزده شاعیرین یالنیز کئچمیش تخللوصونا اشاره اولدوقدا یئنی دن اوز آدی ایله خاطیرلانیر:
ایلاهی!
ای آگه اولان سیرر سماواته ایلاهی!
ای کعبه اولان قبله ی حاجاته ایلاهی!
ای عاشیقی مدهوش ائله ین باده ی هودن
ای جیلوه وئره ن کوی خراباته ایلاهی!
ای عاری اولان هر جوره توصیف و ثنادن
محتاج دئیل سن بو عیباراته ایلاهی!
گر روز جزا اولماسا لوطفون بیزه شامیل
کیمدیر وئره پاداش بو طاعاته ایلاهی!
احسانیو ایلن روز جزا ائیله مودارا
عفو ائیله بیزی سرور ساداته ایلاهی!
یارب سن اوزون (واعظی) حفظ ائیله بلادان
یوخ اوندا دوزوم خیل موکافاته ایلاهی!
اوروجعلی شهودی
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
کیمدی شاعیر...؟
ياشامي بير هايلي-هارايلي قاطاردي شاعرين.
يوكو آغلي-قارالي، بيرنئچه قوجاق شعير.
اينجه مقصدي ،
داش-دمير اوسته سورونور !
اوزون گئجه‌لره
لاي‌لاي چالا-چالا چيرپير، شاعير اوره‌يي .
ايچين يييه‌ن قلمي
آغ‌چلنگلي گله‌جكدن يازير .
اؤزو سئویلمه‌یه‌جکسه ده بيرگون،
سئوير ...، ياشادير .
شام كيمي اريييب،
كپنك‌لرين اوچوشو قدر ياشايير !
كيمدي شاعير؟
هارادي سونوجو بو يولون ...؟
اونو تانييم دييه
قاچديم بو قاطارين آرخاسينجا ،
اۆزۆمه چيرپيلان گوزياشلاريني گوردوم !
چيچكله‌نيب پؤهره‌له‌ننده شعيري،
اوچدو آغزيندان كپنك‌لر ...،
يتيم قالدي كيتابي ،
رسول آرانلی
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
آنا
سو گونو ايدي
آنام ايله گئديرديك قبريستانا
بير مزار سسله دي : بير قيز آغلايير
ياخين گئتديك
بير قيز هؤنكورتويله سسله ييردي :
آنا سئوينجلريم بودارلانيب دير
سن دئميشكن آديني سسله ييرم بو گون
آنا سن يوخسان
درد وار
حسرت وار
اؤلوم وار
باغريم قان
اوره ييم وولقان
گؤزلريم دومان
ياديندامي ؟
ميشيل - ميشيل ياشاييرديم ناغيللار ايچره
من بير كؤرپه اوشاق ايديم
همان اوشاغام
باغريني ديله ييرم آنا
مني چك باغرينا
محبتيندن دولوم
يئني دن دوغولوم
مني كيمسه تانيمایير - كيمسه ائشيتمه یير
ايلك آغلاييشيمدير
ايلك ياسيم دير
ايلك داورانيشيمدير
قيشقيرتيلار - چيغيرتيلار ديدير داغيدير بوغازيمي
بوراسي دونيانين سونو
بوراسي غربت
بوراسي سن سيزليك
بوراسي حسرت
ياس توتوب گؤزلريمده گيله لريم
دويا بيليرسن مني ؟
گؤره بيليرسن ؟
ائوين تورپاق - ائشيگين قبريستان
سئويرسن ائويني - ائشيگيني ؟
درين آجيلاريمي سنده بيتيرديم
سن ايله سندن اؤزومه يئتيرديم
ايندي - نه اولورسا اولسون
سن يوخسان
خوش گلمير منه حايات - سئوينج
اووووووووف... قارا طالئيم
سن سيز نه ائدرم ؟
نه قالارام ؟
نه اولارام ؟
چيچك - چيچك سولورام رؤيالاريم ايچره
يالواريرام تانري یا
گئري دؤنسون زامان
گئري دؤنسون خايال
گئري دؤنسون آنام
آغلاديم ايچين - ايچين
قيزين حالينا
گئری يه دؤندوم
آنام يوخ ايدي
آنام يوخ ايدي
جمیله امام دوست
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
منی ووردولار...
سنی چوخ گؤردولر
آی دوغوردون پنجرهمده
ديوارلاری اوجالتدیلار...
سنی چوخ گؤردولر
گول آچیردین باغچامدا
پاییزی چاغیردیلار...
سنی چوخ گؤردولر
قان دولوردون اورهییمده
قوشون اولدولار
منی ووردولار...
لیلا کحالی
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
گئت یاشا سئوگیلیم سن خوشبخت یاشا
گؤنش قوزئیلرده قانا باتیردی
آرزولاریم باشین آتیب یاتیردی
بیر سئوگینین عومرو سونا چاتیردی
طالعین اویونونا قالدیم تاماشا
گئت یاشا سئوگیلیم سن خوشبخت یاشا
یاتیبدیر سینمده حسرتین چنی
اریدیر آیریلیق گون به گون منی
تاپشیردیم آللاها قؤروسون سنی
بو سئوگینی وورا بیلمه دیم باشا
گئت یاشا سئوگیلیم سن خوشبخت یاشا
سئوینج یوللاریندا ایزیم قالمادی
آلاووم سونوبدور کؤزوم قالمادی
هئییم گئدیب الده ن دؤزوم قالمادی
اومودون اوخلاری توخوندو داشا
گئت یاشا سئوگیلیم سن خوشبخت یاشا
آرادان یوللاری بیچه بیلمه دیم
آیریلیقین قانین ایچه بیلمه دیم
وصال کؤرپوسوندن کئچه بیلمه دیم
گؤزومون دنیزی ایسته یر داشا
گئت یاشا سئوگیلیم سن خوشبخت یاشا
اؤره یم دردلی دیر اؤره یم آغیر
اؤره یم سئوگی سیز اؤره یم ساغیر
گؤلومسه سون دفعه آدیمی چاغیر
"یالغی" یام اللریم چیخیبدیر بوشا
گئت یاشا سئوگیلیم سن خوشبخت یاشا
احد اسدی
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
یامان درد دیر
یامان درددیر گورن گؤزلر اوتانماقدان قارا چکسین
اوتانماز ال ،الین وئرسین یارا وورسون یارا چکسین
یامان درددیر ائشیدمکدن یاناق پورتوب آلین توکسون
اوتانماز دیل هارای چکسین قانین یاخسین قانین توکسون
یامان درددیر اوتانماقدان دوداغ گولسون اورک یانسین
اوتانماز "مرد" الین آچسین اوتانماز "زن" گرک یانسین
یامان درددیر یانان اللر چؤره ک وئرسین یاوان قالسین
اوتانماز مردو نامرده اوزون توتسون کمان قالسین
آداملیق یوخ، آدامسیز چوخ، زامان چؤندو یامان درددیر
یامان درددیر ، یامان درددیر، زمانه چوخلی نامرددیر ...
معصومه ولیپور
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
گوزلریمی چیخاردین
دوداقلاریمی کسین
قورد قولاغیندان آسلایین.
دیلیمی کسین
آتین سویا.
گوزلریمی چیخاردین
قویون کاسیب قیزی هئلله دیب اویناتسین.
اؤلورم و بیر قورو نفسه قوناغام.
منی قارانلیقلاردا باسدیریب بوراخمایین.
منی یاندیرین لوطفن
شعیر دفتریملن.
کول کی اولدوم
سوورون
پوفله یین
قویون گئدیم.
باهار چاغی بیته جه یه م قانقال یارپاغیندا.
منی گامیش دا یئسه
سود اولوب گئده جه یه م گؤزلریمین آردییجا.
یعقوب رنجبر
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
اورك
باخيشلاريم يول اوسته دير
حسرته باخ اوره ييمده.
آهدي گلير، آهدي گئدير
مؤحنته باخ اوره ييمده.
بير بوداغدان قيريلميشيق
سنده، منده يورولموشوق
ايكي گؤز تك آيريلميشيق
قوربته باخ اوره ييمده.
باغلاييب ساچين بير توكو
باغيرير مئيداندا تكي
آغيرديسا، سئوگي يوكو
قودرته باخ اوره ييمده.
اينجه ليكده بير دانادير
شئعره، قوشقويا آنادير
بير سئوگي باهاسينادير
قيمته باخ اوره ييمده.
رضا دهقان ( چنگی )
