فرقتیندن یاندی باغریم

 

 

فرقتیندن یاندی باغریم اوره گیم قان اولدو گل

گل کی رخسارون بو مرده جسمیمه جان اولدو گل

 

دونیانین ناز و نعیمی، باغ و بستانی منه

سنسیز ای سولطان خوبان بند و زندان اولدو گل

 

ایسته دی  لعلین فراقی جانیمی یاخماق ولی

شوقه یانمیش جانه لعلین آب حیوان اولدو گل

 

اول کونول کی دایمن ایشی سنینله وصل ایدی

یاندی شوقوندان اسیر درد هجران اولدو گل

 

جانیمین جانی وصالیندیر وصالیندان اونو

تا کی آییردی فلک بیچاره بیجان اولدو گل

 

عاشقین باغ و گولستانی اوزون گلزاریدیر

هانسی گولزارین گولی گولسوز گولوستان اولدی گل

 

جنتین صحنینده طوبی واله و حئیران و مست

قامتین حسنونده ای سرو خرامان اولدو گل

 

تا منی تقدیر یزدان ائیله دی سندن جدا

کونلومون حالی پریشان دیده گریان اولدو گل

 

معجزاتوندان یاناغون، محکماتوندان ساچون

خار و خاشاکی جهانین ورد و ریحان اولدو گل

 

بحر بی پایانه شوقون جانیمی غرق ائیله دی

گؤر نه بیداد ائیله دی هجرین نه طوفان اولدو گل

 

بو نسیمی سندن آیری بیلدیگیم یوخدور وجود

درد و درمان، وصل و هجران، جمله یکسان اولدو گل

 

عماد الدین نسیمی

 

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

  

 

بو قاره کـؤینه‌گیلـه‌ن سیز قـوْیـۇن مـزاره منـی

 

غملر دریاسی

(صادقپور اوْخۇیان اوْخشامالار)

 

 آدێ «غملر دریاسی» یازانی «عابد صادقپور» چوْخ گؤزه‌ل و اؤنه‌ملی بیر کیتابدیر، بۇ کیتابی بایاتی و اوخشاما کیتابی دئمه‌کدیر. رحمه‌تلیک صادقپور بۇ کیتابدا تۆرک آغێ تؤره‌نلرینده اوْخۇیان بایاتێلاری و اوْخشامالارێ گتیریب و اوْلارێن ایچینده لاپ اۇنلۇ و مشهور نوحه‌لر ده‌نده بیر نئچه‌سین گؤرمه‌ک اوْلۇر، بۇ کیتابین اوْخۇماغێن دۆزگۆن تۆرک مداحلارێنا و تۆرک آغێز گؤرکسؤزۆنۆن آراشدێرێجێلارێنا و سئوه‌نله‌رینه توصییه ائده‌ره‌ک اوْندان بیر نئچه اؤرنه‌ک اوْخۇیاق:

 کیتابێن اؤنۆنده بۇ ایکی دؤردلیکی اوْخۇیۇرۇق:

امانـدی وئرمییـه‌سیز رسـم-ی-روزیـگـاره منـی

اؤلـه‌ن زامانـدا سـوْیـۇنـدورمـایێـن دۇبـاره منـی

حۆسئن‌چییه‌م من اۆچۆن آغ کفه‌ن نه لازیمدیر

بۇ قاره کـؤینه‌گیلـه‌ن سیز قـوْیـۇن مـزاره منـی


***

عـؤمـۆر کئچـدی بیر شاد اوْلۇب، گۆلمـه‌دیم

غــم تــوْزۇنــۇ اۆره‌گـیمـــده‌ن سیلمــه‌دیــم

گؤوه‌رچین تک بیر قۇش اۇمـۇش جاوانلێــق

نئجــه گلــدی نئجــه گئتــدی بیلمــه‌دیــم

***

بۇ کیتابدا اوْخشاما و نوحه‌ده‌ن سوْرا آیری گؤزه‌ل قوْشقۇلارا دا تۆش گلیریک:

 

یاغێش یاغار دره‌لرده‌ن سئل گئده‌ر

بیر گۆن اوْلار بۇرنۇنداکی یئل گئده‌ر

مغرور اوْلۇب دونیایا بئل باغلاما

بۇ اؤلکه‌ده‌ن اوْبا گئده‌ر، ائل گئده‌ر

یایدا قێشدا اۇجا داغێن قارێ وار

باغچالارێن هئیواسی وار نارێ وار

والێ اوْلان ایتیرمه‌سین اؤزۆنۆ

باشێن ایه‌ر هر آغاجێن بارێ وار

هر کیم ایسته‌ر محبتی ساخلاسێن

وارلێ اوْلان یوْخسۇللارێ یوْخلاسێن

هر دوْغۇلان گئتمه‌لیدیر دونیادان

آخه‌ر گره‌ک اجل آتێن هاخلاسێن

سؤیله منه: دونیا کیمه قالێبدێ؟

گؤیده‌ن گئده‌نله‌ری یئره سالێبدێ

یاخشێ دئییب ائل شاعیری شهرییار

«هر کیمسه‌یه هر نه وئریب آلێبدێ»

***

یا بیر آیری دؤردلۆکده بئله گتیریب:

قۇزغۇن گئده‌ر داغلار اۆسته اگله‌شه‌ر

گۆل چیمه‌نده بیر خار اۆسته اگله‌شه‌ر

شریف اوْلماز یۇخارێدا اگله‌شه‌ن

چوْخ تیکاندا دۇوار اۆسته اگله‌شه‌ر

***

سؤیله منه دونیا کیمه ساز گله‌ر

یای قێش گئده‌ر پایێز گله‌ر یاز گله‌ر

دیریلیکده منی چوْخ ایسته‌یه‌نله‌ر

اؤلسه‌م داخێ قبریم اۆسته آز گله‌ر

***

حضرت زهرا (س)- دؤردلۆکله‌ری:

باغرێم اوْلۇب غصّه‌ده‌ن شان-شان آغلار

طبیب آغلار، دردیمه درمان آغلار

گئجه منه غوسل وئره‌ر عم اوْغلۇم

اگه‌ر منی قانلێ گؤرسه، قان آغلار

***

قانلێ: جانی، سنگدل

 

عم اوْغلۇمۇن دوله‌تینده‌ن اۇجالدێم

باج وئرمه‌دیم ظالیمله‌ر ده‌ن باج آلدێم

اوْن سگگیز سیننیده باشێم آغاردێ

جاوان عؤمرۆم کئچیب گئتدی قۇجالدێم

***

بیر آسلان بسله‌دیم یثریب داغێندا

قییام ائیله‌ر عصرین یامان چاغێندا

دوْلانسامدا بهشتین باغلارێندا

گؤزۆم وار کربلانین توْپراغێندا

***

دۆشمه‌ن دانێب حقّیمی بللی بللی

بیلدیرمه‌ره‌م قوْلدا سێنان محلّی

دارێخارام ائله ناماز قێلاندا

نه وقته‌جک قنوت دۇتۇم بیر اللی

***

من زینبم باتدێم عزا گردینه

یالوارمادێم زمانه نامردینه

قودرتی اوْلمادێ هئچ بیر طبیبین

نوسخه یازا اۆره‌گیمین دردینه

ــــــــــــــــــــــــــــ

من زینبم بیلله‌م عئشقین قیمتین

عاشیقلرین هدف‌لرین نیتّین

ایکی تحفه زواریمده‌ن ایسته‌ره‌م

بیر گؤز یاشێ بیرده حۆسئن تۆربتین

***

حضرت رقیه دؤردلۆکلری

 

خزان گلسه بۆلبۆل آغلار گۆل آغلار

درده دۆشه‌ن آبلار آغلار ایل آغلار

خرابه‌نین دیواری یوْخ سقفی یوْخ

گله‌ن آغلار گئده‌ن آغلار ائل آغلار

ــــــــــــــــــــــــــــ

اۆره‌گیمده قۇرتارمایان غمیم وار

دریالاردا غرق اوْلمایان گمیم وار

بیر گۆن گله‌ر قوْلۇن دوْلار بوْینۇما

اۇزۇن قوْللۇ بیر وفالی عمیم وار

ــــــــــــــــــــــــــــ

رقیّییه‌م سؤزه گلمیر دوْداغێم

کربلاده‌ن یارالێدێر قۇلاغێم

شام‌ یوْلۇندا آت ‌دؤشۆنده قاچمێشام

خانمیم عمّه! قابار اوْلۇب آیاغێم

ــــــــــــــــــــــــــــ

خراب اوْلسۇن بۇ دونیانی روقیّه

اوْلۇبسان بۇردا زیندانی روقیّه

گئدیب زهرا قۇجاغێنه یاتارسان

دییه‌ر لایلای بالام جانی روقیّه

ــــــــــــــــــــــــــــ

قۇرۇم تئلون قوْی تؤکۆلسۆن قاش اۆسته

جئیران کیمی اوْتۇرما سن داش اۆسته

دئدین منه سێرغا گتیر معجه‌ر آل

قره‌گیله منکی دئدیم باش اۆسته

 

 

محمودی

قایناق: http://oxsama.persianblog.ir/post/112/

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

اوشاق ادبیاتی (ناغیل)

 

 

قار

 

آنام دئییر:« هئچ بیلیرسن قار نه‌دیر؟»

بیر آز فیکیرله‌شیب دئییرم یوخ.

آنام دئییر:«یاغیشلار گؤیده دونوب قار اولور. بیلیرسن نئجه اولور یاغیش دونور یا من دئییم؟»

بیرآز فیکیرله‌شیب سونرا بیردن دئییرم:« هاوا بیردن سویویور، یازیق یاغیش دامجیلاری دا اوشویوب دونورلار.”»

بونو دئیه دئیه اوره‌ییم توتولور، آنامین دا یاغیش دامجیلارینا اوره‌یی یانیب ائله‌بیل. دئییرم:« آنا! آتا خوخان دونوب قار اولسا بیز نئیله‌ریک؟» آنام تعجوبله منه باخیب دئییر:

- آتا خوخان؟ آتا خوخان نیه دونور کی؟

- اؤزو بعضی گئجه‌لر ائوه گلنده دئیَر هاوا سویوق ایدی آز قالیردیم دونام. بو گئجه چوخ سویوقدور. اولمایا آتا خوخان دا قار اولوب بیز بیلمیریک. باخ هر گئجه بو واخت گلردی ائوه. بو گئجه گلمه‌ییب.

آتامین قار اولماسیندان ائله ناراحاتام آز قالیرام آغالایام. آنام بیر آز اوزومه باخیب سونرا دئییر: «یوخ قورخما! آتان ایندیلره گلر. فقط یاغیش دامجیلاری دوناندا قار اولار، خوخانلار دوناندا فقط دونموش خوخان اولار.» سونرا گولور.من ده گولورم. بیراز سونرا دونموش آتا خوخانیم ائوه گلجک.

 

قایناق: http://www.xoxan.com/

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 تاپارسان منی

کؤچسم بو دونیادان آرا سئوگیلیم
ائلین قوجاغیندا تاپارسان منی
سینم یانار داغ دیر آتشی سؤنمز
وطن اوجاغیندا تاپارسان منی

چؤللره چایلارا دؤنر بدنیم
گونشلی، اولدوزلو گؤیلر کفنیم
بئشیگیم ، مزاریم دوغما وطنیم
اونون تورپاغیندا تاپارسان منی

قارداش گؤزلرینه حسرت دی گؤزوم
منی قارا داشا دؤندردی دؤزوم
قوشولوب چایلارا آخا ندا اؤزوم
آراز قیراغیندا تاپارسان منی

گوللرین شهدی دیر قلبیمد ه دیلک
ایلک باهار عشقی ایله چیر پینیر اوره ک
قیسمتیم اولماسا اوگونو گورمک
لاله یاناغیندا تاپارسان منی

چیچکلی حیاتا ورولوب حسن
ایشیقلی یولونو آلا بیلمز چن
گؤزله سن بویولون کروانینی سن
ظفر بایراغیندا تاپارسان منی

 

حسین ریاضی

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 قارداش!

 

قارالدی قالدی گؤزومده چیراقلیغیم قارداش

قاریشدی اولدوز آلوونا داراقلیغیم قارداش

یاشیل سطیرلری قوسدوردو منده کی خیالین

یاخینلیغیندا گؤوه ردی اوزاقلیغیم قارداش

"گونش" کوچنده قیریلدی گؤزون ده گوزگوسو آه

الیمده قالدی ساچاقلی دوواقلیغیم قارداش

یئتیم چیناردا منه بیر اوراق سالام وئردی

کی قانلی گونلره قالدی اویاقلیغیم قارداش

و آند اولا بو سویوق کور اوجاقلارین داشینا

قوجالدی منده کی کؤرپه اوشاقلیغیم قارداش

 

کامیل قهرمان اوغلو

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

قوي اريسين بوزون داغلار!

 

 

قره داغين  اوجاغيندا

كؤله دونمز  كوزون داغلار

اوبا اوبا ، اويماق اويماق

اوزولرمي سؤزون داغلار؟

 

سنده گزير ، قولدور ياغي

قوغمالي سان ، ياد قوناغي

قوخوياجاق باهار چاغي

كك اوتون ، يارپيزين داغلار

 

آغ اورپه يه بورونورسن ،

غم كده رلي گورونورسن !

قار قئروولا   هورونور سن

قوي اريسين بوزون داغلار

 

گوزونو آچ بيزه بير باخ

ايري يه باخ ، دوزه بير باخ

گوزه للرده نازا بير باخ

آيدين اولسون ، گوزون داغلار

 

دردي ائشيت ، كده ري قان

آليش بيزله ، دردلره يان

اوزو قارا اووچولاردان

نييه دؤنمور اوزون داغلار

 

قارانليقي سوكه جك سن

اوزه  ،قان ياش توكه جك سن

هله دردلر چكه جك سن

اينجي مه سين ، ديزين داغلار

 

كوكسونده بسله نيب " انباز "

عشقينده بير آن اوسانماز

قيش اولسادا ، هئچ يوبانماز

گول چيچك لي يازين داغلار 

 

علیرضا انباز

 

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

  سنی دام دوواردان سوراجایام من     

 

آجیلی هیجرانی یوراجایام من            

قاراگونلریمین چینینده بوینون

سنین گلیشینله بوراجایام من

قیروولو دؤرانین دامی نین اوسته

گونشین بایراغین ووراجایام من

آچاجاق بیلیره م بیرده بوباغچا

یازین ایاغینا دوراجایام من

خیالین خاطیره ن بیرده اوره کله

هرگون مین یغینجاق قوراجایام من

گئجه لریوخوما اولدوز اله نسه

سنین گؤزلرینه یوراجایام من

بوشهره هرگلیب گئدندن کی هئچ

سنی دام دوواردان سوراجایام من 

 

بهمن خادم

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

ملا

سئچیلمیش ائل مثللر یندن

 

ائل گوجو سئل گوجو

آشینا آشینا چیخدی اوجاق باشینا

هر اوخویان ملا نصرالدین اولماز

هرزادین تَزَسی ،دوستون کوهنسی

کدخدانی گور کندی چاپ

اوجوزلو اَتین ،اوجوزلو شورباسی اولار

آداما وای وای دیین چوخ اولار ،چورک وئرن آز اولار

قوناق-قوناقی ایستمز،ائو صاحیبی هئچ بیرین

گئدر بوستان قراسی،قالار اوزون قَرَسی

اَت وئرمه ییب،کوفته نین یئکه سین  ایسته ییر

قاشین آلیردی گوزون چیخارتدی

قارا بخت داغلارا چیخاندا داغلاری دومان آلار

سوز-سوزو گتیرر،آرشین بِئزی

ائلچیسی گولوم اولانین باشینا کولوم اولار

چوخ یئمک  آدامی آز یئمکدنده قویار

میردار اَسگی اوت توتماز

کور بالام اولر آدی قالار بادام گوز

کوزه سو یولوندا سینار

کفن موفته اولسا هاممی اولر

سوز وار ایش بیتیرر،سوز وار باش ایتیرر

سو-سویی تاپار ،سودا چوخوری

پیچاق نه قدر ایتی اولسا اوز ساپینی کَسمز

آللاه وورانی ،بنده قالدیرانماز

خانیم سیندیران قابین سسی چیخماز

قازانینا گوره قاینات آشینی

سو آیدینلیقدی توک اوز قابینا

پالازا بورون،ائل ایله سورون

 

قایناق: بناب نیوز

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

اینجه سؤزلردن

 

 

 

۱- آلما یئرینه بؤرک

 

گئتمیشدیم آلما ،آلماغا.آلماچی دا آلما یوخودو!

آلما یئرینه اوچ ده نه ، بؤرک آلدیم . بو ، بؤرک لرده ن بیریسینی کوچه ده ائوه ساری گئده ـ گئده قویدوم اؤز باشیما. باشقاسینی ائوده گتیریب قویدوم حیات یولداشیمین باشینا . اوچونجوسونو اوغلومون آدینا آلمیشدیم. قویدوم اونون باشینا،اونون باشینا یئکه گلیردی ، آما اوغلوم دینمه دی. اؤز ـ اؤزمه:

یاخشی اولدو هله.باشیمیزا سویوق ده یمز.دئدیم . آخی دونن قار یاغمیشدی ...    

 

۲- باغیشلارسیز بو سیزیندیرمی؟!

 

هارا گئتدیم ، دئدیلر : یوخدو .

الیمده پولوم اولا ـ اولا قالمیشدیم کی،هاردان تاپیب آلمالی ـ یام.یوخودو.

اورا ـ بورا ، او تانیشدان،بو یاد ـ دان.بیر تیکه چؤره ک آلمیشدی. او ، آتلی من ایسه پییادا .

ملول ـ موشکول اوتورموشدوم ائوده، بیرده ن قاپی چالیندی.قونشولاریمیزدان بیری ـ ایدی . سالام لاشدیقدان سونرا دئدی :

ـ باغیشلارسیز بو سیزیندیرمی؟!

من آختاردیغیم ایدی!!!گیج قالمیشدیم . بیلمیردیم یئییم کی منیم دیریوخسا یوخ .

بیر آز دایاندیم . بیر الیم دئییردی : آل باشقاسی دئییردی : یوخ ، آلما! سنین ده ییل .

قونشودان سوروشدو ، هاردایدی؟

دئدی : دوشموشدو ، قاپیمیزین قاباغینا .

آلمادیم . «آلما سنین دئییل » دئیین الیم دوز دئییردی

منیم کی ده ییلدی ...

 

۳-  یازدیم ، پوزدوم

 

یازدیم ، پوزدوم ، یئنه یازدیم ، یئنه پوزدوم ، سون دونه بیر دا یازدیم ، ایسته دیدیم پوزام ، پوزابیلمه دیم .سیلکینی اوقده ر کاغذین اوستونده دولاندیردیم کی سیلگی اوزو پوزولدو . باققال توکانی یاخینلیغیمیزدا اولوردو . گئتدیم اوردان یئنی بیر سیلگی آلام . باققال چوخ آختاراندان سونرا سیلگی آدینا بیر قلم قویدو قاباغیما ...   

        

۴- بر ـ بریمجی ، شاخما آغاجی! 

دونن ایدی سانکی ، بیر قاناد اولدوزدوشدو حیَطیمیزه . البتته حیط دئینده ـ ده کی منیم حیطیم یوخدورکی . اؤزگه نین ائوینین حیطینه کی من ده اوردا کیرااوتوروردوم . بو بیر قاناد اولدوز بیلمه دیم منیم اولوردو یوخسا ائو صاحابینین؟   (اؤزگه ـ ده دئمک اولموردو اونا،ایندی او منیم لاپ یاخین آدامیم اولوردو)

حیطیمیزه دوشن او بیر قاناد اولدوز کی منیم یوخ ، آما منه لاپ یاخین اولان آدامین ائوینین حیطینه دوشموشدو.هر یانی ائله ایشیقلاندیرمیشدیرکی ،گئجه اونون ایشیغیندا اوتوروب اوغلوم ایله بیر آز« بر ـ بریمجی ، شاخما آغاجی ، شاطیر گئچی ، قوغزا آغاجی ... » اوینادیق ، او گئجه ائله کئف ائله دیک ...

 

رضا عالی

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

 سؤزلوک

 

 

 

ایتی: تیز

ایتیلتمک: تیز کردن

ایتیله شمک: تیز شدن


-----------


دوز: درست

دوزه لمک: درست شدن

دوزمک: به نظم درآوردن

دوزولمک: به نظم کشیده شدن


-----------

ساری: زرد

سارالماق: به رنگ زرد درآمدن

سارالتماق: به رنگ زرد درآوردن

-----------

به زک: زینت

به زه مک: زینت کردن

به زنمک: مزین شدن

 

-----------

 

قازان: دیگ

قازان: آنکه  زمین یا جای دیگر را میکند

قازانج: سود ، منفعت

قازما: کلنگ

قازاندیرما: به منفعت رساندن

قازا قازا : در حین کندن

قازانماق: به دست آوردن، صاحب شدن

قازانماز: به دور از منفعت ، بی سود

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

خبر وئردین

 

 

صبا لطف ائتدین اهل درده درمان دان خبر وئردین

تن مجروحه جان دان ، جانه جانان دان خبر وئردین

 

خزان غم ده گؤردون اضطرابین بلبل زارین

بهار ایامی تک گلبرگ خندان دان خبر وئردین

 

سؤزونو وحی نازل گر دئسم من هیچ کفر اولماز

جهانی توتموش ایکن کفر ، ایمان دان خبر وئردین

 

دئدی لر یار عشاقین گلیر جمع ائتمگه کؤنلون

مگر کیم یاره عشاق پریشاندان خبر وئردین ؟

 

سلیمان مسندین دن دیو گمره رغبتین کسدین

دنیزده خاتم حکم سلیمان دان خبر وئردین

 

فضولی ، روزگاریم تیره اولدو شام هجراندان

نسیم صبح تک ، خورشید رخشاندان خبر وئردین

 

ملا محمد فضولی

 

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 بیلمه یه جکسن!

 

عشقین ائله سه عالمی قان بیلمه یه جکسن

یوز دفعه دئسم مطلبی قان،بیلمه یه جکسن

 

باخ سینمه! مین یاره ووروب تیر نگاهین

افسوس کی ای قاشی کمان! بیلمه یه جکسن

 

آخیر کی قوجالتدی منی درد و غم  و عشقین

پیر اولماسان ای تازه جوان! بیلمه یه جکسن

 

بی مهرسن عالمده رخ آلینه حسرت

وئرسمده اگر هیجرده جان ، بیلمه یه جکسن

 

مجنون کیمی زنجیر سر زولفونه باغلی

اولسام داها رسوای جهان بیلمه یه جکسن

 

دوتسام گؤزلیم دامنینی اینجیمه مندن

نئلیم کی دئسم گئتمه دایان ، بیلمه یه جکسن

 

کویوندا گؤزوم یاشینی ، یوز یول ستمیندن

ائتسه م اوزه ای سرو روان بیلمه یه جکسن

 

سرّ لبینی دیلده نهان ساخلادیم ائلدن

فاش اولمایا بو راز نهان بیلمه یه جکسن

 

شوق دهنین واحدی محو ائیلسه هر گاه

اوندان یئنه بیر نام و نشان بیلمه یه جکسن!

 

علی آقا واحد

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!