یول آچماق
بعضی آداملار یاشاییش دا موشگولده قالاندا ، اللری قوینوندا ائله یئره دوشه رلر کی ائله بیلیرسن گمی لری غرق اولوبدور ، هئچ بونا فیکیرلشمزلر کی باشا گلن موشگوله چاره یولو تاپسینلار. دئییرلر بیر نفر چوخ پوزلو دولانارمیش و اللرین شالوار جیبیندن ائشیگه چیخارتمازمیش، او بیر گون قویویا دوشور چاتی ساللاییرلار قویودان نجات وئرسینلر ، سسله نیب دئییرلر کی: فیلانی چاتی نین اوجون بئلیوه باغلا ، چکه ک ائشیگه چیخارداق، قویودان سسله نیر کی : آخی اللریم جیبیمده دیر!
بیر پارا تنبل آداملارین گؤیلونده وار قویویا دوشنده بیر باشقا کیمسه ده اونون دالیجا ، اونون چاتی سین باغلاماق اوچون قویویا دوشسونلر !
بؤیوک تانری قرآن دا ، نجم سوره سی نین اوتوز دوققوزنجی آیه سینده بویورور:
« لیس للانسان الا ما سعی » یعنی اینسانا چالیشدیغیندان باشقا نتیجه یوخدور.
دوزو بودور کی اینسان یاشاییشدا بئینین ایشه سالسین ، موشگول ده ، چاره یولو تاپماق اوچون چالیشسن و بو حئین ده تانری دان دا یاردیم دیله سین ، یوخسا موشگوله دوشن چاغی دیزلرین قوجاقلاییب هئچ بیر ایش گؤرمه یه نین تانری یانیندا دا ده یه ری یوخدور. آنجاق بؤیوک و ایسته کلی تانری، چالیشان اینسانلارا یاردیم ائتمه ک ایسته ییر و چالیشمایان آداملارا هئچ نه یی یوخدور.
پس یاخشی دیر کی موشگول ده دولاشیغا دوشنده ، یالنیز دوعا ائتمه ک و یاردیم دیله مه ک دویغوسو ایله باش قاتمایاق . بونلار یئرینده کن ، یاشاییشدا باشا گلن موشگوللره چاره یولو آختاراق ، فیکریمیزی ایشه سالاق و چالیشماقدان هئچ یورولمایاق. بوردادیر کی تانری اؤز یاراتدیغیندان خوشو گله ر و آتا کیمی اوزو یوخاری قالخاندا الیندن یاپیشار...
یازان: الف. عظیمی بیلوردی ( دادا بیلوردی )
