غدیر زلالی
شعر: دادا بیلوردی
( شعر در سبک زلال )
چیچکله نیــر بو گون محبّت الی
گؤزللیک ایله قاووشمیش نه گؤر عدالت الی
اؤزون نیشان وئریر آنجاق گونشله نرکن ایستی سئوگیمیزی
سالام یاغیــر گونو گوندن اومود باغی ، قانادلانیر آخیر جماعت الــی
قانیم جوشور یئنه دویغوم دامارلاریمدا یانغی یانغی یازیـــــر:
گرکـدیــــر آسمان اوزالـدا حقّـه بئیـعت الـــی
ائدیبدیر عشقدن اطاعت علی(ع)
دوشونجه
دوشونجه گتیردی کئچمیشی یادا
اومموشام حاقیما یالان دونیادا
سیزلادی اورگیم تانیشا ، یادا
یانیمجا بیر گونول قوشا گلمدی
*
سویلدیم دردیمی چیرپیلان یئله
محنتین حدینی دونیالار بیله
بیرلیگه چالیشاق وئرک ال اله
بیرینین آل قانی جوشا گلمدی
*
تپراق تک یاییلدی یوللارا گوزوم
سرداشین یولوندا جالاندی دوزوم
آسیلدی داغ داشا گئلیلی سوزوم
تپراقین چکدیگی داشا گلمدی
*
گلمییر باهارین شانلی نفسی
قویلانیب اورکده چیچک هوسی
بوغولوب دوماندا دورنالار سسی
بو سونسوز انتظار باشا گلمدی
*
سویلییر اوزلرین غملی گولوشی
یوبانیب یوردوما سئوگی گلیشی
قارغانیب باهارین اوغرون گونشی
مین شوکور داناقی قیشا گلمدی
وحید قاسمی
*********
حقوق لا ایلگیلی آتالار سؤزو
6: گئرچک،زامانین قیزی دیر(ایتالیا)
7: ان یاخشی شاهیدلردن،قلم ایله جوهردیرلر(پرتقال)
8: قانون، دیشله مه یه ماراغی یوخ ،اصلینده دیش لرین گؤستریر(انگلیس)
9: گئرچه یی ایمک اولار آنجاق سیندیرماق اولماز(اسپانیا)
10: حق سؤزو،قیلینج دان کسکین دیر(آزربایجان)
11: یاخشی حاکیم پیس قونشودور(آمریکا)
12: قانون،میز اوستونده دیر عدالت ده میزین آلتیندا (استونی)
13: قانون، هامینی یالار(اسکاتلند)
14:گئرچک، قیرمیزی چیچک کیمی، تیکانلی دیر(اسپانیا)
15: حق، قانون دان اوستون دور( روس)
16:بیری دوقتور بیری وکیل!،بونلاردان گئرچه یی گیزلتمه(فرانسه)
17:عدالت همیشه آج دیر(بلغار)
18: هامی عدالته ده یر گؤستریرلر آنجاق عدالت گلینجه قاپینی باغلاییرلار(سوئد)
19: پوللو کیشی نی محکمه یه چکمه
20: رشوه ت قاپیندان گلیرسه،عدالت ده پنجره دن قاچار(تورک)
یازار: ماوی
*********
فلکین اوجوندا
بیرگون بو چمن بو باغچا من سیز قالاجاق
گوللر کوچه سینده بیر پوزوق ایز قالاجاق
چوخ سیخما فلک قانادسیز اوجوندا منی
آخیر کپنک دن بیر اوچوم توز قالاجاق
دوکتور ابراهیم اقبالی
*********
آی لار ایچینده
ائله سوسدوم سؤزوم دیله گلمه دی
ایتدی باتدی های هارای لار ایچینده
اولدوزلاری بیربیر سایا بیلمه دیم
گؤزوم قالدی سنده , سای لار ایچینده
*
دردیم داشدی , بیلنمه دین گئج اولدو
قان یاشیمی سیلنمه دین گئج اولدو
گونلر اؤتدو گلنمه دین گئج اولدو
کوله دؤندوم ایللر آی لار ایچینده
*
یالان سؤزدور گله جکسن ...نه بیلیم؟
یاشاییش دان نه جور گئری چکیلیم
ناغیل لارا بنزیر منیم نیسگیلیم
سارای لار بوغولور چای لار ایچینده
*
کؤنلوم گئدیب دالغالارا قاریشیر
کولک لرین گؤیلون آلیر باریشیر
ایلدیریملار کؤنلوم ایچره یاریشیر
ناله لریم یانیر وای لار ایچینده
*
نئجه داغین ذیروه سینی قار آلار
اوره گیمی غم باسدیقجا قارالار
سوسدوروب دو یاشیللاری قارالار
آرزی گولوم دونار یای لار ایچینده
*
بیرگون گلسَن, باهارلاردان بار گتیر
قوشمالاری اوخشاماغا تار گتیر
آلما گتیر هئیوا گتیر نار گتیر
قویما پاییم قالسین پای لار ایچینده
شبنم فرضی زاده
