34- شعر - موج گهواره سی
موج گهواره سی غواصلارا لایلای اوخویوردو
...غسل تطهیر اولونوب قانیله توفان آراسیندا
آخرین صبح نمازی قیلینیب قان آراسیندا
باخ بوسودایه،اولور جانیله جانان آراسیندا
قانی میدان آراسیندا
باغری قان،گوزلری قان،سجده سی سجاده سی قاندیر
می ومیخانه سی قان،ساغری قان،باده سی قاندیر
بلمی قان،قلمی قان،وصیت نامه سی قاندیر
اوجابوی قامتی قان،پیکری قان،جامه سی قاندیر
اوره گی قان،قاشی قان،سینه سی قان،گوز یاشی قاندیر
یئری قان،تربتی قان،مقتلی قاندیر،باشی قاندیر
موج گهواره سی غواصلارا لایلای اوخویوردو
او قوجالمیش قاری دا رنگی کمانین توخویوردو
نئجه سیزقین اوخویوردو
لای لای ای جبهه لرین یوغونو،ای خسته جوان لار
لای لای ای شهد شهادت دن ایچیپ کامه چاتان لار
لای لای اروند کناریندا قیزیل قانه باتانلار
خوش یاتین ای قورو تورپاقلارین اوستونده یاتانلار
خوش ياتين یاخشی یاتیب سیز
یاخشی باش فیکرین آتیب سیز
یاخشی جانانه چاتیب سیز
صمد قاسمپور
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
ساری بولبول
یئنه یامان داریخیرام
سسین گلسین باری بولبول
باشلا حزین سیزیلتی نی
شاعیرین غمخواری بولبول
خبرین وارمی تبریزدن؟
اوبامیزدان ـ ائلیمیزدن
فلک بیزیم الیمیزدن
آلدی شهریاری بولبول
حیدرباباسی آغلاییر
سهندی سینه داغلاییر
اوشاقلاری گول باغلاییر
بزه سین مزاری بولبول
بیردن ائله گلدی منه
قوللارین آچدی خان ننه
گل ـ دئدی ـ : قوینوما یئنه ...
اوخویاق بیر « ساری بولبول »
اؤلکه بوتون دؤندو غمه
سانکی بوروندو ماتمه
ولوله دوشدو عالمه
گئدیب شهرین یاری بولبول
داردا قالان شئر باغیریب
قئیدینی دونیادان قیریب
آتاسی بیردن چاغیریب
یاندیریب افشاری بولبول
رضا افشار پور (افشار)
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
قون اووجوما!
سن کی بئله بوروشوق دئییلدین
بئله چؤزولمز دئییلدی
گؤزلرین
و ایراق گزردین سیاستدن
نییه قاتیلدین بو قافلانلارین جینایتینه
سن کی گؤیدن آچیق
یاغیشدان دورو
بولوددان
آآآآآخ
یوموشاق
قاییت
قاییت
کؤنلومه سیغین
سن بیر قابارجیق کیمیسن
بوتون کپنکلرین یاشامی سنه باغلی
قون
اووجوما
علیرضا آقازاده
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
بیر گون...
بير گون گئديب
آسيلي قالاجاغام اؤزومدن
نانكورلوغو دويونله ييب
آساجاغام منليگيمين گؤوده سينه
كيمسه تانيماسين سني...!!!
جمیله امامدوست
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
پاییز آخشامی
پاییز آخشامیدیر، اسمیردی کولک
كندين طبيعتي، لاپ توتغون اورك
كؤچدوكجه قارانليق كوچه - باجايا
منيم ده گؤزلريم آسيلدي آيا
بو آن، كوچه ميزده گؤردوم، اويان ليق
معنالي سطيرلر يازير قارانليق
چلييي الينده، بير قاري آنا
بير شوشه نفيت له گئدير بير يانا
انصار قاراداغلی
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
اوشاقلار باغچاسیندان
الیم ایله آیاغیم
بو الیم دیر، بو آیاغیم
بو گؤزومدور بو قولاغیم.
گؤزلریمله من گؤره رم،
قولاغیملا ائشیدرم.
گؤرسم هاردا شوکولات وار
آیاقلاریم دورماز قاچار.
اللریمله سویارام،
تئز آغزیما قویارام.
حبیب فرشباف
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
سئللر قوجاغیندا
بیر ایز یارادیبسان اوره ییمده سن
سیلدیره بیلمیرم ایزینی سنین
ایتیره بیلمیرم گؤز قاباغیندان
کؤنلومو یارادان گؤزونو سنین
یارادان یارادیب سنی ازه لدن
آیریلیق اودونا آتاسان منی
یاغیشدان چیخاریب یاغمورا سالیب
دحشتلی سئللره قاتاسان منی
او قده ر یولونو گؤزلدیم داها
یوللاردا بئزیکدی باخیشلاریمدان
گوزگویه باخیرام اوتانیرام من
آلنیمدا یارانان ناخیشلاریمدان
سن منی کؤنلوندن آتیبسانسادا
من سنی کؤنلومده بسله یه جه یم
سئللر قوجاغیندا اودلار ایچینده
تک سنین آدینی سسله یه جه یم
ملیحه خیر
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
داغدان دوغولموشام بوغا بیلمز دنیز منی
جیسمیم قالیب اوزاقدا آمما من یانین دایام
سس سیز آخیب او قلبینی آلمیش جانین دایام
سانکی دومان تکین بورویوب سوزلریم سنی
چن لر تکین گومانلی یاتان اورمانین دایام
کنعانیمیزدان آیری دوشوب آیریلیقلاری
یوسیف تکین درین قویولار زیندانین دایام
اولدوزلاریم منیم آپاریر سجده ظولمته
یوخ چیخماییر گونش ایشیغین سون جانین دایام
داغدان دوغولموشام بوغا بیلمز دنیز منی
شئرلر یاتاغی من ساوالان وولکانین دایام
یوخدور بیر اینتیظار کی آلیم جننتین باغین
من آدمیله آلمالارین عیصیان نین دایام
یونس جمع آوری
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
منده سئوگی تزه ـ تزه اویانیر
گاه اوره ییم لال دایانیب گاه جوشور
فصیللرین آخارینا سؤز قوشور
آیریلیق دان لاپ باغریما قان دوشور
منده سئوگی تزه ـ تزه اویانیر
گؤرمه ینده گؤزلرینی آغلارام
هارایلارام ، غمدن ماهنی باغلارام
لالا کیمی اوره ییمی داغلارام
منده سئوگی تزه ـ تزه اویانیر
اؤتن گونلر گلیب ـ گئدن نفس میش
سئودیکلریم بوش بیر خیال ، هوس میش
سنسیز اؤتن هر ثانیه م ابس میش
منده سئوگی تزه ـ تزه اویانیر
بیر گؤزلسن گؤزللییین اولدوزو
حیاتیمین بال ـ شکری ، داد ـ دوزو
سیلینمک ده اوره ییمین کاس ـ توزو
منده سئوگی تزه ـ تزه اویانیر
بابک قوجا زاده
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
دئه مني اوزونه اويرتدين نه دن؟؟
اليـمي الينـه آلمایاجایدین
كونلومه محبت سالمایاجایدین
اگـر كي منيمله قالمایاجایدین
دئه مني اوزونه اويرتدين نه دن؟؟
ازل گون ايستكلي سؤيله دين سالام
ايسته دين سن ايله غـربتده قالام
ايندي گئديرسن كي من سنسيز اولام؟
دئه منـي اوزونه اويـرتدين نه دن؟؟
سنلي گونـلريمي وئريرم سـنه
آخير محبتين گـل گوستر منـه
دويغولو كونلومو بورودون چنه
دئه مني اوزونه اويرترين نه دن ؟؟
گئديرسن ياديندا ساخلا بوسؤزو
وفاسیزین گولمیه جک بیل اوزو
گئديشـينله سَپدين يارامـا دوزو
دئه مني اوزونه اويرتدين نه دن؟؟
کیمسه سئوگیمیزین سیرّین بیلمه دی
کونلومون غم توزون بیری سیلمه دی
بئله آستا كؤچدون صونا بـيلمه دي
دئه مني اوزونـه اويرتدين نـه دن؟؟
صونا
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
شعبده قیلیقلاریندان
(سیککه و دستمال)
سیحیربازلیق اوست-اوسته بیر یئته نَک گؤسته ریسيدير. سیحیربازلیق بیرجور بیلیمسل روانشناسلیقدیر و یقین بودور هر کس بو ایشه ال وورور، گرک آز-چوخ گؤرنلرین روانی دورومون تانی یا. بو آندا سیحیربازلیقدا باشقا ایشلر بیلیمسل کؤکه صاحیبدیر. بیلیم یاردیمیلا هیپنوتیزم، مانیه تیزم، روانشناسی، فیزیک و مکانیک ایشلریله اؤزونو یوخاری چکیب.
سیحیربازلیق دونیاسی یالنیز سیحیرده قورتولمور و نئچه دؤنم لر پیلله - پیلله سیحیربازی بوتونله دیر.
بو دؤنملردن ال جلدلیک (تردستی)، گؤزلرین یاهالتیلماسی، سیحیربازلیق، جانلا اویناماق، هیپنوتیزم،
مانیه تیزم و گؤز باغلاماسین ساناماق اولار.
بیر سیحیرباز هر زاددان اؤنجه گرک ال جلدلیک دؤنمین چوخ یاخشی اؤیرنه. بو ایشله سونرالار باشقا دؤنم لره آیاق قويا بیلر. بو ساییدا من بیر گؤزل ال جلدلیک اؤیره دیرم، بیر آز دیققت وئرسز سیزده اؤيرنه رسيز.
بو سفر سیحیرباز چانتاسیندان بیر سیککه و بیر دستمال ائشییه چیخاردیر. هر ایکی سین گؤرنلره گؤستریر و اونلارین نورمال اولماسین بللی ائدیر. سونرا سیککه نی دستمالین اوستونه قویوب، دستمالی بوکور و سیککه دستمالین ایچریسینده قالیر. او بیر نفر گؤرنلردن سئن اوستونه دعوت ائدیر. سیحیرباز تاماشاچی دان ایسته ییر سیککه دن یاپیشیب، الین اؤتورمه سین. سیحیرباز بیردن دستمالین بوجاقلاریندان یاپیشیب، دستمالی آچیر، آمما سیککه ایتگین اولور. سونرا سیحیرباز الین میزین اوستونده کی بوش قوتویا آپاریب، سیککه نی اوردان چیخاردیر.
اویونون گیزلی پاسی:
بو اویوندا سیککه نورمال آمما دستمال نورمال دئییل.
سیککه ایسه ایکی دانادیر. دستمالین بیر بوجاغیندا قاباقجادان بیر سیککه تیکیلیب و
چون دستمالین رنگی قاریشیق دیر او تیکیلن یئر اصلن گؤزه گؤرونمه ییر.
سیحیرباز دستمالی بوکن زامان، سیککه نی آووجونون ایچینه سالیب، تیکیلن سیککه نی تاماشاچی
نین الینه وئریر. بیر آز دانیشیق دان سونرا دستمالی آچیب، آمما سیککه تیکیلن یئری الینده ساخلا ییر.
سونرا دستمالی جیبینه قویوب، آووجونداکی سیککه نی بوش قوتونون ایچینه آپاریب، الین چیخارداندا
سیککه نی گؤستریر. بو اویونو آوروپانین ان بؤیوک سیحیربازی ماروین برگلس تاپیب و ایراندا یک وان نباتی آدلی سیحیرباز بو اویونو چوخ یاخشی و نئچه شکیلده اوینایار. او بیر سفر بو اویونو یاخشی گؤسترمه سینه گؤره جایزه آلیبدیر.
سيحيرباز
وحید چیره دست (روشنلو)
قایناق: http://azergun.com/pdfs/Az5152.pdf
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
تورپاق هله ده پایلاشیر
چؤل اورتاسیندا ایکی توخوم
تورپاغی پایلاشاراق
بؤیودولر
بیری گول
بیری تیکان
....
گولو ایکی سئوگیلی دردی
تیکان ایسه قویون یونونا ایلیشیب گئتدی
گول
اونودولدو
تیکان
آداخلی قیزین الینی ساشدی
ایکی خاطیره
تورپاق هله ده پایلاشیر.
آیدین کنعانی
