غواصلار منظومه سی

 

(سو قوربانلاری)

 

 

سانکی زهراء (س)  بویوران لحظه بلال وئردی اذانی

 
 
 

وار سوزوم، باشلاییرام ائللر اوچون یاشلی گوزیله

قان اوره ک، داغلی سوزیله

یارا کونلوم سوروشور، باشلادیغین سوز نه دی قارداش؟!

بو نه سوز دورکی،اوره کلرده تلاطمده دی قارداش؟!

سئویله مکده ن یوخاری گورمه دی قارداش

دئه مک افسانه دی قارداش

یاش گوزومده ن اَلَه نرکن، کاغاذ ایسلاندی،یاش اولدو

گوزیاشیم سئلله نیب، اروند ده ن آخماقدا باش اولدو

بیرنئچه کیپریگی قان یاشیله گوردوم هاماش اولدو

یئنه گوز یاشیله دولدو

یئنه  دوران کاغاذ اوسته دوران دوتدو دولاندی

یئنه اروند ده کی صحنه جان آلدی تازالاندی

یئنه غملر قالاغ اولدو یغیشیب قالدی قالاندی

دوزومون قابی جالاندی

ایتیره رکن اوزومو، گاه دولانیب گاه دایانیردیم

گاه اویوب، گاه اویانیردیم

ده لی اروندی تانیردیم

ده لی اروندی تانیردیم، نئجه طوفان ائله میشدیر

گئجه نین سون چاغی غواصلارا طغیان ائله میشدیر

بدر و خیبر آجیغین سینه ده پنهان ائله میشدیر

قانلارا، قان ائله میشدیر

منی وجدان سیخاراق قان تر ایچینده بوغولوردوم

بوغولارکن یئنه باشدان جان آلیب جان دوغولوردوم

دانلاق آلتیندا قالیب گاه اوغولوردوم

آللاهیندا قاپیسیندان قوغولوردوم

بو حزین پرده نی گورمه کده پوزولدو نئجه حالیم

قاراکیپریکلری غواصلارا بَنزه تدی خیالیم

اود، دوروب اودلادی بیر لحظه ده، سونموشدوم آلیشدیم

اوج محنتده چالیشدیم

قلم ایسته رکی سو قوربانلاری، غواصلارا یازسین

تیتره ییر ال، یازابیلمیر

هوولده ن  آز قالیر آغزیم، قورویارکن سوزون آزسین

سوز گوزه لدیر ، آزابیلمیر

قلمیم ایسته ییری، تا یازا غواص بالالاردان

اوره گیم سویله یه  ایللر بویو، سیزقین یارالاردان

او یورلماز قارالاردان

کیم یازیر، گور هارالاردان

یوخ سو قوربانلارینی  وصف ائده، قدرت قلمیمده

یوخدو  ایثار حدیثین یازا، جرات قلمیمده

یوخ لیاقت قلمیمده

اونلارین نیسگیلینه موجلار آغلار، بلم آغلار

کاغاذ آغلار، قلم آغلار

بیلمیرم خیرداجا  بیر  کلمه ده قدرت نه قدر وار

هامی قارداش قانا بیلمز

بیلمیرم عاشیق اولان قلبیده جرات نه قدر وار

بونو کیمسه  آنا بیلمز

طبع شعریم دایانارکن دئییری سوزده اثر یوخ

عملین اولماسا، یازساندا یاوان سوزدو  کسر  یوخ

آغاجین اولسادا، بَر یوخ

یاش گوزومده ن آخاراق سئویله دیم اِی طبع دایانما

آرخایین اُول، منی دانما

دوزدو یوخدور عمل آمما، قارا باغریمدا یارام وار

بو گوزل بنده لریله تانیشام من ده، آرام وار

کیمسه یه یازمالییام، هاردا هارام وار؟!

من ده عشق اهلییم اما هله منصور اولا بیلمم

بالاجا زمزمه یم، نغمه ی  پرشور  اولا بیلمم

ذره یم، نور اولا بیلمم

غرق اولوب جومموشودوم موجلی دریای خیاله

قان اولارکنده اورک دولدو  سرشکیله پیاله

قلم ایله، کاغاذی اوز، اوزه چاخناشمادا گوردوم

ده لی اروندی آیاق باش، باش ایاق داشمادا گوردوم

قانی، قایناشمادا گوردوم

قانلی نخلستانا باخدیقجا، سئچیل میشلری گوردوم

قارا، گئیمیشلری گوردوم

آیریلیق آخشامی کند ایچره نه هایلار، نه هارایلار

آیریلیق دائمی اولدو، نه بیر آیلار، نه مین آیلار

یار، اوز یارینی هایلار

اوقارانلیق«سوله لر» ایچره عجب زمزه مه لر وار

قانلی اروند کناریندا بویوک خاطره لر وار

نخل لرایچره نه لر وار؟!

یا حسین نغمه سی کندی بورویرکن، اوجالیردی

بیری ایسته کلی سی نه، چاتماغی نین قولون آلیردی

آللاهی یاده سالیردی

بیری باش سجده ده، معبوده مناجات دئییردی

بیری ده آیریلیقین خلعتین، عشقیله گئییردی

نه لر آللاهه دئییردی؟!

بیری نین گوز یاشی نئیسان کیمی گوزده ن اله نیردی

بیری بیر گوشه ده اوز، تورپاغا قویموش، مه له نیردی

نئجه سس سیز دیله نیردی

یا غیاث المستغیثین یا اله العالمین

یا غیاث المستغیثین یا ولی المومنین

انا عبدک الذلیل

انا عبدک الضعیف

بیری ده کرب و بلا سمتینه حسرت له باخیردی

گوزونون یاشی آخیردی

یاحسین یا حسین، گه لیریک ها، آغاجان

بئله کی معلوم اولور، دینجه لیریک ها، آغاجان

سنده ن اوترو مه لیریک ها، آغاجان

آللاهین دا، اَلَه یی اووسه له ییب سونراسئچیردی

سئچی لنلر، هامی بیر بیر اَلَه نَرکنده کئچیردی

هامیسی جام بقاده ن سوایچیردی

آیری بیر عالمی دیر، آخشام، اوگون نخل لرایچره

بئله بیر عالم اولارمیش؟!

گَره ک اوستاد طریقت اوتوروب درس آلا قارداش

وورا، زانوی تعلم یئره حیران قالا قارداش

شمس او خلوتگهه بیر لحظه اگر یول سالا قارداش

قاییدار دال-دالا قارداش

اوردا عرفان باش آلیب اوج دوتارکن هاوالاندی

سیندی سیررین قوروغو، پرده لر اوردا،آرالاندی

سان تماشاگه رازین دا حجابی پارالاندی

اوردا نامحرم اولانلار قووالاندی

اورانین عالمی باشدان - باشا حالدیر،داها قال یوخ

اوردا دیدار اوقده ر  واردی کی معشوقه مجال یوخ

شهدا مَهدی، بقا عالمیدیر، اوردا زوال یوخ

اوردا حالدیر، داحا قال یوخ

اورا بیریئردی کی آهولری مافوق ختن دیر

اورا بیر یئردی هامی لاله لری پاره بدن دیر

اوردا باشدان باشا، گوز ایشله یه لی،سرو و سمن دیر

اورا بیر آیری وطن دیر

اورا  مهد شهدا دیر، اورا خرگاه ولادیر

اورا معبد، اورا مسجد، اورا محراب دعادیر

حرم امن خدا دیر

گون چونوب آخشام اولوب یئتدی ملاقات زمانی

باشلادی وئردی یانیق سَسله، موذن بیر اذانی

بیر اذانی کی سالیب  لرزه یه  جانی

هامی نین قاینادی قانی

سانکی زهراء (س)  بویوران لحظه بلال وئردی اذانی

خانمین سون نفسی، آزقالیری آیریلا جانی

بلالین آخیر اذانی

خانمین چیخمادا جانی

هامی قان آغلایاراق باشلادیلار قانلی نمازی

هامی باش سجده ی وصلت ده ائدیر راز و نیازی

نَه دَه رین راز و نیازی

نه نمازی

بیر نمازی کی ملک لر هامی صف باغلادی قارداش

غرق دریای عبادت هامی قان آغلادی قارداش

سینه لر داغلادی قارداش

عرش اعلاده ملک لر هامی حسرتله دئییردی

نه گوزه ل بنده لرین وار!

نئجه رزمنده لرین وار!

قاش قارالدیقجا داها پالچیق اوتاقلار بوشالیردی

بیربیرینده ن هامی آیریلمادا، گوزلر یاشالیردی

کربلا صحنه سینی یاده سالیردی

آیریلیق واختی یئتیشدی هامی آغلاشمادا  قارداش

بیر، بیرین باغرینا باسماقدا، حالاللاشمادا  قارداش

جبرئیل تکجه جهادین قاپیسین آچمادا  قارداش

هامی غواصلار اوزاقلاشمادا  قارداش

قارا گئیدیکده هاوا، قاره گیینلر قارالاندی

قارا پالتارلیلارین گردانی کوچدو، آرالاندی

کیمسه یه دونیا قالاندی؟

گون باتار کن شفق آلتیندا  هاوا  قاره گئییردی

یئل ده چیرپیب اوزونو نخل لره  بئیله  دئییردی:

بو گئجه  مو جلو  اروند بوتون قان اولاجا قدیر

بو گئجه  سئوگیلی گوللر سارالار کن سولاجاقدیر

بو گئجه  چوخلو  بلم لر ایچینه قان دولاجاقدیر

نخل ل رساچ  یولاجاقدیر

بوگئجه چوخلاری اروندده مظلوم  یاتاجاقلار

بوگئجه آللاها عشاق، فقط جان  ساتاجاقلار

بوگئجه بیرگئجه دیر عالمی گوزده ن  آتاجاقلار

بزم  یاره  چاتاجاقلار

بوگئجه چوخلو رقیه دوروب آغلار اولار، اولماز؟

اَریده ن دونیادا داغلاری بو داغلار اولار اولماز؟

چوخلو  لئیلا  بو گئجه، اکبرینه آغلایاجاقدیر

عالمی داغلایاجاقدیر

نخل اسلامه ده غواص بو گنجه  قان  وئره جکدیر

قان  وئره رکن  اوزو  قانسیزلامادا، جان وئره جکدیر

جانی قوربان وئره جکدیر

اولماسا یاره سی کیمسه، حرم یاره گئدنمز

هر گوزون اولماسا قان پرده سی دیداره گئدنمز

هر باش عالمده بلی عزتیلن داره گئدنمز

بزم دلداره گئدنمز

یئیتشر بیر یئره، ائیلَر اُوز-اوزونده ن سفر عاشق

عشق میدانینه شوقیله اولار رهسپر عاشق

حلقه داری گوروب قانلی لب ایله، اوپر عاشق

اولین مرحله ی  عشقیده باشدان کئچر عاشق

بو هیاهودا شوقیله گَلیب قافله کئچدی

ساقی بزم شهادت، گوزل اینسانلاری سئچدی

قان شرابین، هره ظرفیتی نین قدری جه ایچدی

فقط آللاه، هامی هئچدی

تا «ترانی» سسی معشوقده ن اُول جَمعه یئتیشدی

جام  اروندده تا جلوه ی دلدار گوروشدی

دسته دسته سودا باتماقدا،اوشاقلار یولا دوشدی

بو سفر آیری بیر ایشدی

آیری یول، آیری گئدیشدی

داها گوز گورمه دی مظلوم بالالاردان اَل اوزولدو

گوزومون پرده سینه  قات قاریشیق  صحنه دوزولدو

سونرا تا صبح آچیلینجا قلم عاجزله مَه دِئیدی

نگران با خمادا گوزلر، سحری گوزله مَه دئیدی

فجر صادق یاریلارکن، گئجه نی بیزله مه دئیدی

ظولمتی دیزلمه دئیدی

تکجه آللاه بیلیر، صبح اچیلینجا نَه لَر، اولدو

ظولمتین باغری ده لیندی، قاش آغاردی سحر اولدو

قارالیق دربدر اولدو

گئجه غواصلارا زهرای بتول(س) آرخا دایاندی

قوپدو بیر قائله، خط سینمادا دوشمان قووالاندی

نعش، نعش اوسته قالاندی

سحر اروند جوشوب، موج ووروب باشدان آشیردی

هله وور-سیندیریدی خط ده،اوشاقلار ساواشیردی

یخیلیب بعضی سی اروندده قانه بولاشیردی

هله بعضی سی یاشیردی

قان بلم لرده داشیردی

داحا صبرین چاناغی چارپالانار کن جالانیردی

نگران گوزلریم ارونده باخیردی، سولانیردی

آختاریردی، تاپابیلمیردی، دوروردو، دولانیردی

هانی عبداله شکوفه، هانی سردار دلاور؟

هانی منصور، هانی محسن؟هانی جانباز تکاور؟

هانی راشد؟هانی دباغی و سلطانی و نادر؟

هانی کاظم، هانی الوانی و نجاری و قادر؟

مهدوی لر هانی، سجاد و رضالر هارا گئتدی؟

شیخ علی لر هانی، با عشق و صفالر هارا گئتدی؟

بئله کی معلوم اولور، عشقلی باشلار دارا گئتدی!

بالاسین گورمه میش عباس، اوره یئینده یارا گئتدی

چوخ اوره کلر پارا گئتدی

یئری دیر مظلوم اولان مشهدعلی ده ن ده یاد اولسون

بلم ایچره او غریبانه دوشنده ن ده  آد اولسون

پاک روحی شاد اولونسون

شهداء محفلی مقتلده قورولموش نه صفالی

بزم جاناندا، هامی جمع ایدی شمعین یری خالی

یانا، تا آرتیرا حالی

او وفا مجلسی نین واردی نه قیلی نه ده قالی

اورا، بوردان چوخ آرالی

ناگهان موج ووروب بیر بلمی ساحله قارداش

ارجمندی ده شمع اولدو او گوزه ل محفله قارداش

دولدو، دوغرولدو سینیق قافله قارداش

بلم ایچره باشی نین قان شفقین شاخمادا گوردوم

عشق اودیلن اَرییب، شمع کیمی آخمادا گوردوم

یاندیریب یاخمادا گوردوم

گوز دوشوب گوردو نئجه قانه بویانمیش قره لردن

قوی دئییم منظره لردن

بیر طرفده ییخیلان قول-بویون اوچ یولداشدی گوردوم

بیر طرفده یارالی سیمه دولاشدی باشی گوردوم

بیر طرفده نئجه خورشیدییه باتمیش قاشی گوردوم

بیر طرفده باشی یوخ بیر یارالی قارداشی گوردوم

موج ووران قان یاشی گوردوم

غسل تطهیر اولونوب قانیله توفان آراسیندا

آخرین صبح نمازی قیلینیب قان آراسیندا

باخ بو سودایه، اولور جانیله جانان آراسیندا

قانلی میدان آراسیندا

باغری قان، گوزلری قان سجده سی سجاده سی قاندیر

می و میخانه سی قان، ساغری قان، باده سی قاندیر

بلمی قان، قلمی قان، وصیتنامه سی قاندیر

اوجا بوی قامتی قان پیکری قان جامه سی قاندیر

اوره گی قان، سینه سی قان، گوزیاشی قاندیر

یئری قان، تربتی قان، مقتلی قاندیر، باشی قاندیر

موج گهواره سی غواصلارا، لای لای اوخویوردو

او قوجالمیش قاری دا، رنگلی کمانین توخویوردو

نئجه سیسزقین اوخویوردو

لای لای ای جبهه لرین یورغونو، ای خسته جوانلار

لای لای ای شهد شهادت دن ایچیپ کامه چاتانلار

لای لای اروند کناریندا قیزیل قانه باتانلار

خوش یاتین ای قورو توپراقلارین اوستونده یاتانلار

خوش یاتین یاخشی یاتیب سیز

یاخشی باش فکرین آتیب سیز

یاخشی جانانه چاتیب سیز

دوزدی تاریخده حال اولمادی ایثاریزی یازسین

هله تئز دیر یازا بیلمز

دوزدی عالمده چیخار اولمادی اسراریزی قانسین

قارداشیم یوخ، قانا بیلمز

بوتون عالم یغیشا بیرجه آناز تک یانا بیلمز

بونو هئیچ کیم دانا بیلمز

دوزدو سس سیز یارالاندیز، سویا باتدیز، قانیز آخدی دوزدو ظالیم قودوروب خنجرینی سینه زه تاخدی

دوزدو سیز جان وئره لی بوینو یوغونلار هامی باخدی

نیسگیلیز عالمی یاخدی

قوی قانیز آخسادا، آخسین

اجنبی باخسادا باخسین

خنجرین تاخسادا تاخسین

نه قدرجسمیده جان وار

نه قدر قولدا توان وار

نه قدر داماردا قان وار

داها چیخماز یادیمیزدان، یادی نیز، دیلده قالاندیر

سیزین آواز عشقیز له جهان وارسا جهاندیر

باش اَیَن، سیز لره قارداش اوجا داغلار ،ساوالاندیر

باشی قار، سینه سی قاندیر

سیزین ائللر آرا، ایللر بویو، یادلار دا یادیز وار

آیریلیق داغی گورن قانلی اوره کلرده آدیز وار

آللاهیز وار  هر زادیز  وار

سیزلر آخیرده گئدیب مقصده چاتدیز بونا سوز یوخ

یاخشی باشدان،یاشاییش فیکرینی آتدیز بونا سوز یوخ

یاتدیز آمما یوخودان خلقی اویاتدیز بونا سوز یوخ

امما سیزلردن اوتور چوخ گوزو یوللاردا قالان وار

سیز گئده نده ن سورا معلوم اولالی چوخ قوجالان وار

چوخلو رنگی سارالان وار

آنالار داغی سهندین داغی تک بیرجه داغ اولدو

چوخلو بئل سیندی بوکولدو، قارا بیرچکلر آغ اولدو

سحر، آخشام، گئجه گوز یاشلاری آخدی بولاغ اولدو

غم قالاندی قالاغ اولدو

او بولاغلار سئل اولوب کُفر ائوی بر باد اولاجاقدیر

او یانیق قلبلرین، آهی دا، فریاد اولاجاقدیر

یئر اوزو، داد اولا جاقدیر

بئله مظلوم لارین آهینی آللاه یئره سالماز

پوزولار ظالمین ارکانی، بوظولم آخیره قالماز

کفر بایراغی اوجالماز

گوره جکسن  باشا-باش  ارض و سماء  نوریله دولدو

اوندا بیردن گوره سن  دان یئلی اسدی، سحر اولدو

فجر صادق ده سوکولدو، قارالیق دربدر اولدو

چوخ بویوک بیر ظفر اولدو

اوندا هر یئرده یاشیل بایراغی اَسمکده گوره رسن

اوندا اینسان هامی، قارداش

اوندا اینسان هامی، قارداش

 

صمد قاسمپور

زمستان ۱۳۶۴

والفجر ۸  عملیاتی  – ارونددن کئچیب فاو بندرین آلان گونلر

 

 دوزلوک یاخشی بیر زاددیر

ایضاح:

عزیز اوخوجولار! یوخاریداکی منظومه نین بیر آز بؤلومو کئچن نومره میزده آیری آدامین آدینا یازیلیمیشدیر . بو سهو اوچون سیز قلمداشلاردان عذر دیله ییریک. آنجاق اینترنت عالمی یولا دوشدوکده آییق اولمالی ییق. وئبلاقلارین چوخونا اعتماد ائتمک اولماییر . دونیانین اوزونده دوزلوگون بولاغی بولانمادا بعضی کسلرده  ائله او راحتلیکده،یازماق آغیریسیدا چکمه ییب، اؤزگه نین شعیرین گؤتوروب کوپی ائدیب وئبلاغینا سالیب اؤز آدینا ثبت ائتمه گی  مان بیلمه ییرلر!

عزیز شاعر صمد قاسمپور جنابلاری یوخاریداکی شعره زحمت چکیب  اؤز عملی اورک جوهرلرین مقدّس دفاع یولوندا ، دویغولو کاغاذ اوزره تؤکوبلر ، یاخشی دگیل بیر آیری آدام اونو گؤتوروب اؤز آدی ایله آیریلارا خرج ائتسین. بیز دفاع هفته سین عزیزله مک اوچون  یوخاریداکی شعیرین بیر حصّه سین اینترنت دن گوتوروب چاپ ائتدیکدن سونرا بئله گؤردوک. تاسّف اولسون کی او آدام، شعیری اوز وئبلاغیندا اوز آدینا یازمیشدیر . بو سهوی بیز سونرا بیلدیک. بیلمه ییردیک بولانلیق سودان بالیق دوتانلار واردیر. رسم بودور کی بیر شعیردن آیری یئرده فایدالانارکن شاعیرین آدین ذکر ائدرلر. آنجاق دوزلوک یاخشی بیر زاددیر.

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

 

ناغیل

 

 

هرنه یادیندان چیخدی!

 

هر گوندن تئز ايشلريني قورتاريب ، تر ـ تله سيك  چانتاسيني گؤتوروب ائوه ساري یوللاندی . هئچ زامان ائوه گئتمك اوچون بو قدر تله سیب  قاچمامیشدیر . خياواني ائله كئچدي كي آز قالدي ماشين آلتيندا قالا . يولونون اوستونده راست گلن دوست - تانيشلارایله دايانيب دانيشماماق اوچون تكجه باشي ايله «سالام» وئريب اؤتوشوردو. چوخ زامان اولاردي كي بير خبر يوخ ايدي . آنجاق ، بوگون سحردن بير زادلار باشينا گلميشدير . اونا گؤره ده هيجان ايچينده بوغولوردو . هئچ بيلمه ميشدير نئجه ايشلريني قورتاريب يولا دوشموشدو كي بيردن اؤزونو  آپارتمانينين قاباغيندا گؤردو . پيلله لري جوت ـ جوت  چيخيب ، ائوي نين  قاپيسينا چاتدي . تر - تله سيك قاپيني آچيب ، اوتاغينا ساري قاچدي . چانتاسيني ياتاغين اوستونه توللاييب ، ماسانين آرخاسيندا اوتوردو . نئچه آي دان سونرا بو گون سحر بير رمان موضوعسو بئينينده يارانميشدير . گونونو او رومانا قول ـ قاناد وئرمكله سووموشدو . آنجاق يامان سئوينيردي . تكجه ديله يي او روماني كاغاذ اوستونه گتيرمك ايدير . بير قلم گوتوروب يازماق ايسته دي . آنجاق گؤزو الينين آلتيندا اولان آغ كاغاذ يئرينه ايجاره قبیضينه ساتاشاندا هر نه ياديندان چيخدي !...

بابک قوجا زاده

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 


 

یاشاسین ایران

 

سگگیز ایل بیزه خنجر ووردولار

سگگیز ایل آنا باجیلاریمیزین اورگین تیترتدیلر

سگگیز ایل بیزی مقدّس دفاعه مجبور ائدیب دؤیوشه چاغیردیلار

سگگیز ایل بیزیم پاک توپراغیمیزا طاماح سالدیلار

سگگیز ایل بیزی اؤلدورمک اوچون شیطانلاردان کؤمک آلدیلار

سگگیز ایل سؤزو کسرلی قوجا انقلاب رهبرینه قان اوددوردولار

سگگیز ایل بیزه شماطت  یاغدیردیلار

آمما بیلمه ییردیلر کی بو اؤلکه ده تانری یا أن یاخین اولان بیر عارف مزاری وار دیر.بیلمه دیلر بیزیم سگگیزینجی ایمام ایمیز ، علی ابن موسی الرضا حضرتلرینین الی دوعاده دیر. اونون روحو  بیزه یاردیم اولموشدور. بیزیم  تانری یا یاخین کؤمکلریمیز واردیر. بیز عاشورا  یانانلاری ییق. بیزه هرکیم چپ باخسا ایکی دونیاسیدا هئچدیر. یاشاسین ایران.