بهمن آیی گؤزل آیلارداندیر

 

بهمن آیی موبارک اولسون

 

 


 

بهمن آیی أن گؤزل و برکتلی آیلارداندیر. بو آیین اون ایکی سینده ایمام خمینی(ره) حضرتلری وطنیمیزه آیاق قویدوقدا آییقلیقلاردان پای گتیرمیشدیر. او  بو آیین ۲۲سینده  ایراندا اسلامی انقلابی رهبرلیک ائدرک ، ائلین سسی ایله حقّی آلقیشلایانلارا گوج وئریب و هابئله تانری نین  یاردیمی ایله اسلامی انقلابی پیروزلوغا چاتدیردی.

بو آیدا دونیانی حئیرته سالان انقلابین پیروزلوغا چاتماسین بوتون قلمداشلارا  تبریک دئییب ، وطنیمیزین و ها بئله ایسلامی اینقلاب رهبرلیگینه داوام وئرن بویوک شخصییت ، خامنه ای حضرتلری نین ساغلیغین اولو تانریدان دیله ییریک.

   

 

سئچیلدی آغ قارادان  

 

گون آخشام اوستو کی باتدی،سئچیلدی آغ قارادان

بیر آنی  سئوگولو  یـاتــدی  سئچیـلدی  آغ  قـارادان

 

نــه جـور  سینـار  آدامی  پس بو  عالمین گؤزلی ؟!

نـورایـله  ظولمتـی  قاتـدی ، سئچیلدی  آغ  قارادان

 

یـاییـلدی  اورتـایـا  سئـوگی  قیزیشدی  آل وئــریمیز

بیـری  آلیب  بیـری ساتـدی ، سئچیلدی  آغ قارادان

 

بـو دونیانین  ایشی  آنـجاق  حساب کتـاب ایله دیـر

نیـگاریم  عشقی یاراتـدی ، سئچیـلدی  آغ  قارادان

 

دئـیـیـردیـلــر کی  پـس  آلله  اوزاق  گـزیــر  دادا دان

غـریـبلیـگیم  سونا  چاتدی ، سئچیلدی  آغ  قارادان

 

دادا بیلوردی

 

 

 

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

هارداسان ای توپراغی یاقوت مرجان ائیله ین

 

بیر نیگاریم وار پریشان باغریمی قان ائیله ین

زولفو تک افکاریمی دائم پریشان ائیله ین

صبریمی تاراج ائدن الدن آلان آرامی می

عشقی مجنون تک منی رسوای دوران ائیله ین

شمع تک هر بزم ده اغیارینا خندان اولان

قونچا تک لبخندینی عشّاقه پنهان ایله ین

بوینوما زنجیر آسان دیوانه لر تک گزدیرن

قتلیمین فرمانینی هر یئر ده اعلان ائیله ین

بیلمیرم بو دلبری چیم وار دلارام ائیله سن؟

بیمیرم بو کافری کیم دیر مسلمان ائیله ین؟

وای نه خرمنلر کی سئودادان توتوپ اودیاندیلار

واینه دریالر کی عشق اونلار دا طوفان ائیله ین

کهربایه اوخشایار حسرت غوباریندان اوزوم

هارداسان ای توپراغی یاقوت مرجان ائیله ین

بیر باخیش بو درده دوشموش کئونلومون درمانی دیر

«ناظر»یم آمما هانی بو درده درمان ائیله ین

 

محمد رضا ملک پور ( ناظر شرفخانه ای )

قایناق:http://shaer-azarbaijan.blogfa.com/

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

  زلال شعیری بهمن آیی نین  ایکی سینده دوغولوبدور 

 

 

زلال شعیری بهمن آیی نین  ایکی سینده دوغولوبدور.

ایکی ایل اولار کی « زلال » شعیری معاصر ادبیات عالمینه وارد اولوبدور. بو آز زاماندا زلال فورماسی ( سبک زلال ) اؤز  ایستییه نلرین و هاواسین ساخلایانلارین یانینا چکدی. سئوینیریک کی بو گون ایران، افغانستان، تاجیکستان، آذربایجان و باشقا باشقا اؤلکه لرده ، بو سبک ده شعیر یارادیرلار. اوجور کی من بیلیرم، بو گونه دک ایکی یوز حدودینده شاعیر  دونیانین  اؤلکه لرینده زلال دئییرلر. و نئچه لری ده ، زلال شعیرین تانییاندان سونرا ، باشقا شکیلده کی شعیرلرین داها دالیسین دوتماییرلار.

چوخ زلال یازان شاعیرلر واردیلارکی ایسته سک بیر بیر اونلارین آدین آپاراق اوزونا چکر. و بونا گؤره ده کی بو ژانرین آردیسی واردیر و قلمدن دوشن اولار ، بیرینین دلگیر اولماسینا سبب اولماغی ایسته میرم. آنجاق شکّسیز ، دونیادا باجاریقلی شاعیرلر  واردیرلار کی  بو یئنی « زلال » فورماسیندان استقبال ائدیب ، قالارغی و شاهکار زلال یارادیرلار. بونو بیلمک لازیمدیر کی : بیر شعیرین یئنی یارادیجیلیغیندا، هنری باخیملار  اونون قالارغی اولماغیندا مؤثّردیر . دئمک اولار بدیعی سبک ده، ژانر قانونلاری، ریتم و آهنگ هاوالاری ، ادبی صنعتلر و قالیبین شکیلی نظره آلینمالیدیر.

« زلال » شعیرین، یاراشیق و هنر باخیمیندان سالیب چیخماق ، درین ساوادلا دوزگون  تدقیق ایسته ییر. چونکی اوزدن باخماقلا « زلال » قالیبلری نین  بوتون چیخارلارین ، شعیر عالمینده ، یئنی یارانیش باخیمیندان ، سایماق مومکون دَییل. بونلان بئله  زلال قالیبی نین داها  موسیقی چیخارلیغین  و هنری گوجون دانماق اولماز . نییه کی شاعیرین بوتون ایسته یینه جاواب وئرندیر و یئری واردیر بو چیخارلاردان کی باشقا  شعیر قالیبلرینده ده کی آز دَییل، باجاریقلی فایدالار تؤرنسین.

نه اولار ائشیدک: بیر « زلال » یاراناجاقدیر کی بوتون ادب یانقی لارین بو گؤزل و دادلی قالیبده دویورسون! بو ایش اولماز مگر  باجاریقلی زلال یازانلار  چالیشیقلاری نین دالیسین دوتسونلار.

خوشبختلیکدن، بو گونه دک یارانان زلال لارین چوخو، زلال فورماسی نین  گله جکده  داها ایشیقلانماسیندان خبر وئریر. هئچ شکّ  ائتمه یین کی « زلال » ، یاخین گله جکده ، دونیا ادبیّاتیندا، اؤز  واقعی یئرین آلاجاقدیر.



دوکتور ثریّای حکیم اوا

استاد دانشگاه خجند. تاجیکستان.

قیش – 1390  هــ. ش

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

بوی آتدیلار تره لر

( آردیلی عروضی قافیه لی زلال)

 

  

 

بُـوی آتـدیلار تره لر

آچیلدیـلار یـاریمچیـق حنجـره لـر

عطیرله نیرسه گولوشلر،یول اوسته سئوگی بیتیر

باخیش سَپیر ایشیقلی پنجره لر

گلیب سنی گؤره لر

 

دئییشمه،سن،منه تای

یئتن کؤنوللری آنجاق گئنه سای

آخیـــردا دوزلـوک اؤزونـدن بـو یئـرده ایـز سالاجاق

ایتیب باتاندیر هر نه دنسه قولای

قــالان اینـامـلا هـارای

 

 

مفاعلن فعلات

مفاعلن مفاعلن فعلات

مفاعلن مفاعلن مفاعلن فعلات

مفاعلن مفاعلن فعلات

مفاعلن فعلات

 

شعر: دادا بیلوردی