آنامين يايليغي !

 

 

آنا بير سئوگي دي نازدي،

آنا بير نغمه دي سازدي،

آنا باشدان باشا آنلامدي اؤركدي،

آنامين يايليقي بير چنگه ايپك‌دي-

غونچادي گولدو چيچك‌دي.

،،،،

آنا دردله باريشاركن ،قووشوب درده تاي اولدو،

گئجه-گوندوز چاليشاركن، وصفه سيغماز هاراي اولدو،

كؤرپه‌سي آدديم آتينجا ،هرگؤنو دوز بيرآي اولدو،

دارگؤنونده باشينين يايليقي نذر اولدو پاي اولدو-

فيكره دالديم بئله درد عاشيقي كيمدير ...؟

آنادير يوخسا حكيمدير...؟

 

آنا كيمدير؟ آنا كيمدير !

آنا ائل عاشيقي ائللرده بزك‌دي

او صاباحدي ، گله‌جك‌دي .

،،،،

ائل آرا كينه عداوت يئر آلاندا،

سؤز-سؤزه باتماز اولوب قان قارالاندا،

قورخودان كؤرپه لرين باغري ساپاقدان قيريلاندا-

آنانين سون سؤزو يالنيز دانيشيقدير،

آنا صولح عسكري يايليق باريشيقدير ...

آنامين يايليقي ياردير ياراشيقدير .

،،،

گه‌ل دئييم بيرده ائلين شانلي گونوندن،

توي گونو برلي -بزكلي او آل-الوانلي گونوندن،

باشي يايليقلي گلين‌لر، گلينه خونچا بزه‌رلر-

آنالار باشدا گزرلر ،

يايليقي دينگه ووروب تويدا سوزرلر...

سؤز قوشوب ماهني دوزرلر،

گول وئررلر گلينه ،

آنانين يايليقين عادتدي دولارلار بئلينه .

،،،

قوي دئييم بيرده ائلين قانلي گونوندن !

كئچميشيندن موغانين بير قارا داستانلي گونوندن،

دوشونولمز بيري خايين چيخاراق نفسه ساتيلدي،

آديني خان قوياراق، خالقا قاتيلدي،

اووا چيخميشدي بي گون بايرام آييندا ،

داياندي آرپا چاييندا-

گوردو بير نازلي گلين قاشلاري يايدي،

نه گلين سانكي بير آيدي،

تانريردان وئرگي دي پايدي،

دئدي بو نازلي گلين خانلارا تايدي...

،،،

باشي يايليقلي ساراي،سالدي هاراي !

باغري آليشدي ...

خانين ايرنج باخيشيندان جانا گلدي،

او ساراي كي يايليق اؤرتنده دييه‌ردين آنا گلدي...

دردي بير-بير سانا گلدي،

سون گوروش ميدانا گلدي.

اؤزونو آرپا چاييندان آتاراق ديللره دوشدو،

ساري يايليقلي ساراي ماهنيسي محفيللره دوشودو.

اؤلكه‌يه ائللره دوشدو...

ياشادي يادداشيميزدا،

سئوينجده گوز ياشيميزدا-

آنا دونيا بويو سؤنمز بير ايشيقدير،

آنا صولح عسكري يايليق باريشيقدير.

 

رسول آرانلی

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

آراز بایاتیلاری

 

 

آرازیم آیریلمادی

قوم ایله قایریلمادی

هیجر اودونا یانسادا

کول اولوب ساوریلمادی

 

آراز تئللی سازیمدیر

سسیم دیر آوازیمدیر

اونون سرین سولاری

باهاریم دیر یازیمدیر

 

آراز یاشیل زمی دیر

اوستونده کی گمی دیر

آراز او تای بو تایا

بیر آغ ساققال عمی دیر

 

آراز اوزانیب گئده ر

سویونو وئرمز هده ر

نازلا آخیب چؤللره

اورکلری شاد ائده ر

 

آراز آخار نازیله

عاشیق چالار سازیله

جاوانلارا توی توتاق

سازیله آوازیله

 

آرازدا وار فیرتانا

غملری گلمز سانا

اؤلدوروبلر ساراسین

قان آلاجاق او،قانا

 

آراز قاینار داغلاردان

نعمتی وار فراوان

اورک لرین دردینه

آرازین سویو درمان

 

آرازیم خومارلانیر

دالغالار یووارلانیر

سویو گئدیر خزره

خزرده ووقارلانیر

 

آراز سویو دورولدو

شنلیک ایمیز قورولدو

اوزرینده آرازین

مین بیر کؤرپو وورولدو

 

اسماعیل ممّدلی

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

من ناغیل سیز قالمیشام

 

گونش گؤیون اورتاسیندا و من اؤنومده اولان باغا ساری آدیم آتیردیم. آخار سولارین سسینی ائشیده رک، یولوما داوام ائدیردیم. ایختیارسیز اوزاقداکی آغاجلارین کؤلگه سی آلتیندا اوتوران قادینا ساری گئدیردیم.  یاخین لاشاندان سونرا، گؤردوگومو هئچ اینانابیلمیردیم. یئرده اوتوران قادین آنام ایدی. چوخ زامان ایدی آنامی گؤرمه میشدیم. او منه چوخلو حیکایه لر تعریف ائیلردی آنامدان چوخ دیرلی سؤزلر اؤیرنمیشدیم. آناما یاخین لاشیب اونون یانیندا یئره اوتوردوم، محبتله الیمی اوجونا آلیب. چنه می یوخاری قالدیردی. گؤزومون ایچینه باخاراق آلنیمدان اؤپدو ، سونرا بوینونداکی بویونباغینی بوینوما سالدی. ساچلاریمی دارایا دارایا بیربیریمیز ایله دانیشیردیق. او یانیمدا اولان زامان ناغیل سیز یاتماز ایدیم. هر گئجه آنامدان ایسته یردیم. منه ناغیل دئسین. اونون ناغیللارینی چوخ سئوردیم. آنام ساچلاریمی دارایا دارایا ناغیلینی دئمه یه باشلادی. بیردن، بیر سس منی آنامدان آیردی. او  اؤگی آنامین سسی ایدی. یوخودان آینییاندان سونرا هله ده آنامین بویونباغی بوینومدا ایدی.

   اونوتمارام آنامی،

     سسله ییرم هی، اونو ، 

      « من ناغیل سیز قالمیشام .»

 

ندا صمدی

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

یامان درددیر

 

 

یامان درددیر گورن گؤزلر اوتانماقدان قارا چکسین

اوتانماز ال ،الین وئرسین یارا وورسون یارا چکسین

 

یامان درددیر ائشیدمکدن یاناق پورتوب آلین توکسون

اوتانماز دیل هارای چکسین قانین یاخسین قانین توکسون

 

یامان درددیر اوتانماقدان دوداغ گولسون اورک یانسین

اوتانماز "مرد" الین آچسین اوتانماز "زن" گرک یانسین

 

یامان درددیر یانان اللر چؤره ک وئرسین یاوان قالسین

اوتانماز مرد و نامرده اوزون توتسون کمان قالسین

 

آداملیق یوخ ، آدامسیز چوخ ، زامان چؤندو  یامان  درددیر

یامان درددیر ، یامان درددیر، زمانه چوخلو  نامرددیر ...

 

معصومه ولیپور

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 

 

 

 شاعیر خوشنام ایله آشیق قافارین دئییشمه سی

 

شاعیر خوشنام :

چوخداندیر اوزادیب ایسته ک الینی

کدرلی الیمی سیخمیرسان نییه ؟

سبه بینی سؤیله،آچیق ،آشکارا!

آزقالیر اوره ییم سنده ن، اینجییه

 

آشیق قافارین جاوابی:

کدرله دانیشیب،خاطیریمه  دیمه

دوست دوستلا،کدرلی دانیشار نییه!

چتین دیر بیر دوستون اله گلمه یی

محبت،ایپینه،سن وورما، تییه!

 

شاعیر خوشنام:

سبب سیز دوستونو، یادا،ساتمیسان؟

یادیندان چیخاردیب گؤزدن آتمیسان؟

نه اوچون دوست دئییب ال اوزاتمیسان؟

الیمی سیخمیرسان دوست دئییبه،دئییه؟

 

آشیق قافار:

اورکده دوستلارا واردیر محبت

کدرآغاجین،یاردیر ،محبت

سئوینج  ایسته یینه  یاردیر محبت

عبس یئره ،گل دانیشما ،نیسیه

 

شاعیر خوشنام:

مندن یان گزیرسن،ناسیل آ،یولداش

محبت یولونو قویما ،توتسون داش

گئچن گونلریمی دئییره م کی،کاش

بیرگه،یاشایایدیق،بیرگه،اؤلکه یه

 

آشیق قافار:

دئه،نه دن؟ بیلیرسن آرالییام من

مگر،من نه چیـیم،هارالییام من

زامانین الیندن ،یارالییام من

لقمان ایستر،درمان ائده خستیه

 

شاعیرخوشنام:

آمما،سن،بیرکره بوراخدین منی

دولدوردون گؤزومه دومانی چنی

سالیرسان ساچیما،کدرده ن،دنی

دئه گؤروم دوستونو ساتدین نئچییه؟

 

آشیق قافار:

دوستدان اوز دؤندرمک یاراماز منه

امتحانا چکیب سونرادان ،قینه

دوستلاریمین یاشی کاش چاتا مینه

دوشمانلارین اولا ،چارگی سیه

 

شاعیرخوشنام:

سن منی ان یاخشی باشا ،دوشوردون

کوهنه یارامی دا،گیزلی ،دئشیردین

محبتی آرامــــــــــــیزدا بیشیردین

نه اوچون؟ ده ییشدین بیشمیشی چییه ؟

 

آشیق قافار:

ایللر ،زحمت چکیب آد آلمیشام من

قوهوملاری ساتیب یاد،آلمیشام من

قیزغین،محبتدن،داد آلمیشام،من

چتین دیر دوست دوستون اوزگه یه  قییه

 

شاعیر خوشنام:

یالدیز ائله،اوز الینله کؤنلومه

یا گتیر ،قوی کؤز الینله کؤنلومه

سئویل مه یی دوز الینله کؤنلومه

گل،ناقد ائله،قویما ایشی،نیسیه

 

آشیق قافار:

یاندیریب ،قلبیمی،کؤز،ائله ییب سن

دیلینله دئمه ییب،گؤز ائله ییب سن

سئویب سئویلمه گی،یوز ائله ییب سن

اینسان اودور،سؤزون دییه ،سوسمییه

 

شاعیرخوشنام:

دوشه میشم ماتاهیمی،بو یئرده

گیزله میشم اؤز،آهیمی بو یئرده

آشیق قافار،گوناهیمی بو یئرده

آشکار سؤیله خوشنام کیمی کیشییه

 

آشیق قافار:

قافارین اوره یین گتیرمه درده

گیزلی سؤزون سؤیله هئچ چکمه پرده

خوشنام دوستوم خطا اولسا بشرده

حققه اوز دونده ریب مطلب ایستییه

 


 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

 


 

 گئت یاشا سئوگیلیم سن خوشبخت یاشا

 

 

گؤنش قؤزئیلرده قانا باتیردی

آرزولاریم باشین آتیب یاتیردی

بیر سئوگینین عومرو سونا چاتیردی

طالعین اویونونا قالدیم تاماشا

گئت یاشا سئوگیلیم سن خوشبخت یاشا

 

یاتیبدیر سینمده حسرتین چنی

اریدیر آیریلیق گون به گون منی

تاپشیردیم آللاها قوروسون سنی

بو سئوگینی وورا بیلمه دیم باشا

گئت یاشا سئوگیلیم سن خوشبخت یاشا

 

سئوینج یوللاریندا ایزیم قالمادی

آلاویم سونوبدور کؤزوم قالمادی

هئییم گئدیب الده ن دؤزوم قالمادی

اومودون اوخلاری توخوندو داشا

گئت یاشا سئوگیلیم سن خوشبخت یاشا

 

آرادان یوللاری بیچه بیلمه دیم

آیریلیقین قانین ایچه بیلمه دیم

وصال کؤرپوسوندن کئچه بیلمه دیم

گؤزومون دنیزی ایسته ییر داشا

گئت یاشا سئوگیلیم سن خوشبخت یاشا

 

اؤره ییم دردلیدیر اؤره یم آغیر

اؤره ییم سئوگی سیز اؤره ییم ساغیر

گؤلومسه سون دفعه آدیمی چاغیر

"یالغی" یام اللریم چیخیبدیر بوشا

گئد یاشا سئوگیلیم سن خوشبخت یاشا

 

احد اسدی (یالغی)

 

 

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

  

 

 اورمو گؤلونون دیلیندن بیر غزل :

 

ایللر بویو حیاتیما قوردون کمین، گونش!

آزقین گونش بلالی گونش ذاتی جین گونش!

 

سن هرنه سوزلادین او قدر من دایازلادیم

آی ییرتیجی باخیش لاری مندن درین گونش

 

ایللر اولار کی  آخمادی بیر چای  بو دوزلاغا

مندن آلان بولود لاری  بس نیله دین گونش؟

 

اولما بوراخدین اونلاری یئللر قاچیرتدیلار

یا آزدیریب، آلاخلارا  وئردین کبین،گونش!

 

قارشیندا  بوغلایان سولاریمدان اوتانمادین

بیرده آخان دامارلاریمی  پی له دین، گونش!

 

بیرقیسسا  بوی لی  دالغانی دا  قالدیرانمیرام

یئللر اسنده قیوریلیرام  چین به چین، گونش!

 

آخ قارقیمیش! گؤروم سنی سؤنسون آلاو لارین

گؤیده دؤنوب داشا اولاسان بیر سرین گونش

 

آی ییرتیجی باخیشلاری مندن نفس آلان

سؤیله منیم بولودلاریمی نئله دین گونش؟

 

صالح سجادی

 ۱۳۹۰/۶/۱۲ تبریز