گؤزه لیم   گل   قونوشاق  باهم   اوره ك دن  دانیشاق 

سئوگی دن ، آرزیـــلاریمدان ، گَله جــك دن   دانیشاق

بیزكی  بیـــر عؤمر  بو  زندان دا   قالانلار  دَه ییلیك 

باش  ووراق  گولشنه   بیــر یولدا  چیچك دن  دانیشاق

دویغوموز  لاپ  آخــار اولسون  سؤزوموز أن دادلـی 

سوسوزا  سو ، آجــــا  البتّه   چـــــؤره ك دن  دانیشاق

قارغیلانمیش   یئری  دولدوردو  دومانـلار  دور گَل !

تانری دان   نـور  دیله ییب  خالقا  كؤمك دن  دانیشاق

سئوگی   یوردوندا   دوُنان  دویغـولارا  بـاش  وئـرمه 

یاخشی  اوْلماز  داهــا  یاز  فصلی  كولك دن  دانیشاق

سؤیكه نه ركن   گونشه، عـدل دن  آرتیق  سؤز آچاق 

یازیـــق  اینسانلارا   یاردیـــــم   ائـله َمك دن  دانیشاق

دونیــانین  یـوخ   یییه سی  ظولم   چیخیبدیر  عـرشه 

گل گوناهسیز  قان  اودان   حوری - ملك دن دانیـشاق

آختاریب  بیـرجه  تاپاق  گؤیده كی  بخت  اولدوزونـو 

عؤمرومــه   قـوْورا   چَكن  چـــرخ  فلك دن  دانیشاق

هئچ  بیلیرسن  نهَ یَه  خاطیر  سنه  بئل  باغلامیشام؟! 

هئچ  بیلیرسن  نییه  یالواردیم   اوره ك دن  دانیشاق؟!

ایستیرم   گوزگو   اولام   یئرلــه شه سن    باغـریمدا 

حُسنیوه  تانـری  وئـرَه ن   بوْللو   به زك دن  دانیشاق

منه   بایرامدیـــر  او گون  كی  جمالین  شمعی  شاخا 

باغــــری  یانمیش « دادا » آدلی  كپَهَ نك دن  دانیشاق

 

دادا