حضرتِ علی یه ، قوربان اولوم من

 

 

 

 

 


اوّلجه کعبه دن ، دونیایه باخان

جهالت گؤیونده ، گونش تک شاخان

قاریشیب  قانلارا ، داماردا  آخان

حضرت علی یه ، قربان اولوم من

 

*

لیلة المبیت ده ، بسترده  یاتان

گؤزوندن قورخونو ، وحشتی آتان

اسلامین  هایینا ،  دادینا  چاتان

حضرت علی یه ، قوربان اولوم من

 

*

بَدرده ، اُحد دا ، آسلان تک  دوران

خندق ده  کافرین ، بوینونی  ووران

خیبرین  قاپیسین ، الینده  بوران

حضرت علی یه ، قوربان اولوم من

 

*

غدیرین حدیثی ، اولسادا  ازبر

ایکی آیدان سورا ، بوکولدو دفتر

خانه نشین اولان ، تاریخه سرور

حضرت علی یه ، قوربان اولوم من

*

وفاسیز دوسلاردان ، اورگی آلقان

آرزوسی - ایستگی ، دیلگی آلقان

مسجدی - محرابی ، کورگی آلقان

حضرت علی یه  ، قوربان اولوم من

 


رامین بخشی