تورکجه ادبیات صحیفه سی

ده زلال پند (3)

*

21- گؤزون ییغ

*

سؤز دییه ر هر گل گئدن

ائوله نیبسن دای گؤزون ییغ اؤزگه دن

بو یاشاییش کی ائدیرسن تک هوس، شهوت ، دَییل

گؤیلره  روح پس یئره گئتمیش بدن.

درسین آلمیشسان نه دن؟

*

22- مرهم

*

مرهم اوُل درمانلیغا

موشگول اولما  هئچ  زمان  آسانلیغا

سئوگی لر آلقیشلاسین  قوی  درده  درمان تک  سنی

باخما کی  بیر کس  دالیر  حیوانلیغا

سن چالیش انسانلیغا

*

23- باور

*

وئرمه  ألدن  باوَری

دوتما  دونیانین  ایشین   چوخ  سرسری

بعضی  اخلاق  وار  چاپار  داللار  بوتون  شیرین لری

زهرمار  ائیله ر  یالان  خوش  گونلری

افترادن  اوُل  بری

*

24- آتا

*

قویما  گون  بارسیز  باتا

وار  سنه   گــــر    بیـر  محبّتلی  آتا

هر سحر آخشام  تومارلا  کؤنلونو حالین  سوروش

راضی اولما   بیر گئجه  غمگین  یاتا

دونیانی  باش دان  آتا

*

25- آنا

*

عشقینی  دوز  یان یانا

قوی آپارسین  سهم  اونلاردان  آنا

وئر کؤنول اول شخصه کیم  قارنیندا  بَسلیبدیر سنی

یوخسا  بنزه ر سن  وفاسیز حیوانا

هئچ نه  قالماز دونیانا

*

26- ائوله نگیلن

*

زنده گانلیق  چون  گیریش

دوش   بوشا   بَرکه  آخیر   صبریله  پیش

ایمکانین  اولسا  سوبای  چوخ  قالما  دای  ائوله نگیلن

چونکی  اوُل  دونیایه  پاداشدیر  بو  ایش

آرتار آلله دان  گه لیش

*

27- صبر

*

ده یسه ده  باشون  داشا

وئرمه   قانماز   بیر  آداملا   باش باشا

صبریله  قالدیـــر آراده ن  سیمتن   موشگوللــری

قویما  سیرتیق  فیکرلر  باشدان  آشا

آز  یـاشا  آزاد  یـاشا

*

28- آز دانیش

*

جَمعه گیردین  آز دانیش

آز  دانیش  امـّا  عوض ده   ناز  دانیش

سؤزلری  بیر بیر  پیشیر  سونرا  چیخارت  قوی  بوشقابا

حافظه ن  گر  اولسا  تنبل،  یاز  دانیش

دوز فیکیرله ش ساز دانیش

*

29- فتنه

*

دوشسه جانون داشلیغا

دعوت  ائیــــله  یولداشون  قارداشلیغا

گؤردون  اخلاقی  قولای دیر  گونده  بیر  شرّ  آختاریر

سون  قُوی آخیر  بیر  بئله  یولداشلیغا

فتنـه لـی   سیـرداشلیغا

*

30- توقّع سیز

*

شاهی گؤرمه  آهی گؤر

غم سپاهیـله  اولان  همراهی  گؤر

سعی  قیل  ألدن  توقّع سیز  دوتوب  آللّهی  گؤر

نه خانی  نه اَربابی  نه جاهی  گؤر

درده  درمانگاهی گؤر