منه بايرامدير او گون كي...
منه بايرامدير او گون كي...
گؤزه ليم گل قونوشاق باهم اورك دن دانيشاق
سئوگي دن، آرزيلاريمدان ، گَـله جك دن دانيشاق
بيزكي بير عؤمر بو زندان دا قالانلار دَه ييليك
باش ووراق گولشنه بير يولدا چيچك دن دانيشاق
دويغوموز لاپ آخار اولسون سؤزوموز أن دادلي
سوسوزا ســو آجـا البتــّه چؤره ك دن دانيشاق
قارغيلانميش يئري دولدوردو دومانلار دور گَل!
تانري دان نور ديله ييب خالقا كؤمك دن دانيشاق
سئوگي يوردوندا دوْنان دويغولارا باش وئـرمه
ياخشي اوْلماز داها یاز فصلی كولك دن دانيشاق
يانغيلي قوْ ل بويون اولماق نه قَـَدَه ر رؤياده ؟!
گل دوْداق بير اوز اوزه آنجاق امك دن دانيشاق
بير قوجاق شنليك ايله كؤكسومو قيوْراق دولاناق
اؤلكه مه شار سالاق ايستكله ديلك دن دانيشاق
قلبيمي آل اليم اوستوندن آخـان قانيمي گـؤر
قلم آلتيندا سينان باغلـــــــي بيلك دن دانيشاق
قافالــــــي ائللـــــريمين قايغيلاريـــن دويدوقجا
گؤز ياشيمدا بوْغولان خسته بَبَك دن دانيشاق
سؤیكه نركن گونشه عدل دن آرتيق سؤز آچاق
يازيق اینسانــلارا يارديـــم ائله َمك دن دانيشاق
دونيانين يـوخ يیيه سي ظولم چيخيبدير عرشه
گل گوناهسيز قان اودان حوري - ملك دن دانيشاق
آختاريب بيرجه تاپاق گؤيده كي بخت اولدوزونو
عؤمرومه قوْرا چَكن چرخ ِ فلك دن دانــيشاق
هئچ بيليرسن نهَ يَه خاطير سنه بئل باغلاميشام
هئچ بيليرسن نييه يالوارديم اوره ك دن دانيشاق؟!
ايستيرم گوزگو اولام يئرله شه سن باغریمدا
حسنيوه تانري وئره ن بوْللو بزك دن دانيشاق
منه بايرامدير او گون كي جمالين شمعي شاخا
باغـــري يانميش دادا آدلي كپَهَ نك دن دانـــيشاق
بیلوردی
